Categories Navigation

Categories Navigation

El Principáu desactiva'l protocolu por contaminación atmosférica na zona d'Uviéu

29/01/2022
  • Los rexistros de partícules PM 2,5 nes estaciones del Palaciou de los Deportes y Llugones ya tán per debaxo de los valores llímite


La Conseyería d'Alministración Autonómica, Mediu Ambiente y Cambéu Climáticu desactivó'l protocolu por episodios de contaminación atmosférica na zona d'Uviéu al menguar los valores rexistraos de partícules PM 2,5.

El dispositivu activárase de forma preventiva, esto ye, nel so nivel 0, el xueves, día 27, al algamar valores elevaos en partícules PM 2,5 nes estaciones del Palaciu de los Deportes (Uviéu) y de Llugones (Siero) y dase simultáneamente condiciones desfavorables de ventilación. Los niveles baxaron ayeri en dambes estaciones per debaxo de los valores consideraos pa l'activación del protocolu.

La aglomeración del área d'Uviéu inclúi, amás d'esti conceyu, los de Noreña, Siero, La Ribera, Llanera y la zona industrial de Morcín.

Igualmente, el Conceyu de Xixón desactivó tamién el protocolu pa la zona oeste de la ciudá.

L'alerta en nivel 0 ponse en marcha cuando la concentración de partícules na atmósfera ye superior a 25 microgramos por metro cúbicu (µg/m3) de PM 2,5 (partícules de diámetru inferior a 2,5 micres) o de 45 µg/m3 pa les PM 10 (con diámetru inferior a 10 micres), trés díes en siquiera una estación de la zona y simultáneamente existe previsión de fenómenos meteorolóxicos qu'en un favorezan l'espardimientu de contaminantes na atmósfera (estabilidá atmosférica, inversión térmica y ausencia d'agües).​​​