Categories Navigation

Categories Navigation

Santa Bárbara Sistemas concentra n’Asturies toles fases del ciclu productivu de los vehículos blindaos del grupu n’España

29/01/2022
  • La compañía comunica al Gobiernu del Principáu que la planta de Trubia asumirá esti añu la integración de les unidaes qu’hasta agora se realizaba en Sevilla
  • El conseyeru Enrique Fernández considera la decisión una  “grandísima noticia” pa la industria rexonal “porque la fábrica consolida’l so futuru como centru de referencia del sector”

 

Santa Bárbara Sistemes va concentrar n'Asturies toles fases de ciclu productivu de los vehículos blindaos del grupu n'España. La compañía comunicó al Gobiernu d'Asturies la so intención de convertir la fábrica de Trubia en centru de referencia nacional para esta llínea de negociu, lo que supon qu'estes instalaciones van asumir la fabricación ya integración completa de los blindaos.

La decisión foi comunicada al conseyeru d'Industria, Empléu y Promoción Económica, Enrique Fernández, y a los representantes de los trabayadores pola dirección de la compañía, y va facese efectiva a lo llargo d’esti añu.

Anguaño, Santa Bárbara Sistemes tien estremáu'l ciclu productivu de los blindaos ente les factoríes de Trubia, onde se fabriquen les barcaces o estructures, y el centru d’Alcalá de Guadaira (Sevilla), que realiza la integración de los vehículos. La intención de la compañía ye centralizar n'Asturies tol procesu, polo que la planta de Sevilla va especializase nel ciclu de vida de los vehículos y va ser centru loxísticu y de caltenimientu 4.0.

Fernández calificó esti anunciu como una “pergrande noticia p'Asturies y pa la nuesa industria porque refuerza les capacidaes de la factoría de Trubia y consolida el so futuru como centru de referencia na fabricación de vehículos blindaos, amás d'apurrir más hores de trabayu, más actividá y más empleos”.

Según el conseyeru, la decisión confirma'l bon momentu de la industria de defensa n'Asturies, que se suma a la positiva evolución d'otros subsectores productivos como la construcción naval, el agroalimentariu, les inversiones anunciaes nel sector del aceru, la construcción y polo xeneral les empreses metalúrxiques.

Fernández tamién treslladó'l sofitu del Gobiernu d'Asturies a los planes de la compañía y estimó a la empresa'l so apueste pol afitamientu de la fábrica de Trubia como centru de referencia nacional del grupu na fabricación de blindaos.

La decisión enmárcase nuna reordenación de los activos industriales de la compañía coles mires de reforzar la eficiencia y competitividá de la compañía y adaptar la so estructura granible a los cambeos nel sector de la defensa a nivel global y nacional.

Esti anunciu realízase un mes depués del entamu de la fabricación de les primeres unidaes del blindáu VCR 8x8 Dragón pal Exércitu de Tierra, el mayor contratu llicitáu pol Ministeriu de Defensa por un importe cercanu a los 2.000 millones.

Esti contratu contempla la fabricación de 349 unidaes del VCR 8x8 Dragon mientres un periodu de diez años. Cola reordenación interna del grupu, la factoría de Trubia va ser la encargada de la fabricación de les plataformes del blindáu y de la so integración.​​​