Categories Navigation

Categories Navigation

Mediu Ambiente conclúi la construcción de la depuradora de Vega, en Ribeseya, tres una inversión de casi 500.000 euros

29/01/2022
  • El vicepresidente Juan Cofiño anuncia una partida de 2,2 millones pa les obres de saneamientu de la cuenca del ríu Samiguel, que van entamar esti añu


La Conseyería d'Alministración Autonómica, Mediu Ambiente y Cambéu Climáticu concluyó la construcción de la estación depuradora d'agües residuales (EDAR) del pueblu de Vega, nel conceyu de Ribeseya, na que s'invirtieron 495.115 euros cola fin d'evitar el deterioru ambiental que causen los arramaos al regueru que desagua na sablera.

El vicepresidente y titular de la conseyería, Juan Cofiño, que visitó güei la nueva instalación hidráulica cola directora xeneral del Agua, Vanesa Mateo, y l'alcalde de Ribeseya, Ramón Canal, anunció que la depuradora va tar operativa en marzu, en rematando la tramitación del contratu eléctricu y l'autorización d'arramáu.

La nueva estación consta d'un alliviaderu-bombéu d'agua bruto y la llinia de tratamientu ta formada por dos unidaes compactes nes que s'integren un tanque primariu, un reactor biolóxicu por aciu biodiscos y un decantador secundariu, ente otros elementos. Nel futuru ta prevista la incorporación de los arramaos de les localidaes de Torre y Barredo y los del camping de Vega.

Ente otres actuaciones, el proyectu inclúi tamién la execución d'un colector a la entrada de la estación, conectáu cola actual rede de saneamientu. Pa recoyer los arramaos que se realicen na zona de la sablera, instalóse un bombéu qu'enllaza col colector d'entrada.

Esta obra foi cofinanciada pol Fondu Européu de Desenvolvimientu Rexonal (Feder).

Per otra parte, Cofiño anunció qu'el so departamentu prevé empecipiar les obres de saneamientu de la cuenca del  ríu Samiguel depués del branu. El proyectu, que va salir a llicitación nes selmanes próximes, consiste na recoyida de les agües residuales de los arramaos de Sotu, La Granda, El Carmen y Samiguel hasta Sebreño, que dispón d'una rede de saneamientu que llega hasta la EDAR de Ribeseya.

El presupuestu de la conseyería destina una partida tresañal de 2.200.000 euros a esta actuación, de los que 500.000 van invertise anguaño, 1.000.000, en 2023, y 700.000, en 2024. El plazu d'execución va ser de 18 meses y el costu tamién va ser cofinanciáu con fondos Feder.

A estes obres súmase la estación de bombéu d'agües residuales de Sebreño, yá executada y en funcionamientu, con una inversión de 295.700 euros.

Cofiño destacó que Ribeseya va ser ún de los conceyos beneficiaos anguaño pola partida de 200.000 euros dirixida a iguar  los problemes d'infiltraciones d'agües marines en sistemes de saneamientos de distintos conceyos costeros. Nesti sentíu, confirmó la conclusión de la renovación del colector de la redolada de la cueva de Tito Bustillo que presentaba problemes d'infiltraciones. La inversión de Mediu Ambiente nesta actuación algama los 274.054  euros.​​​​