Categories Navigation

Categories Navigation

El Gobiernu d’Asturies pon en marcha’l Plan de Xestión de Cuenques Fluviales pa favorecer el remonte del salmón atlánticu

29/01/2022
  • Mediu Natural empieza les repoblaciones usando caxes biodegradables con güévares qu’eclosionen dientro del calce

 

El Conseyeru de Mediu Rural y Cohesión Territorial, Alejandro Calvo, visitó güei en Casieḷḷas (Valdés) ún de los tramos nos que se tán realizando trabayos de meyora del hábitat fluvial de los calces asturianos. El centru de precintaxe del Esva ye un bon exemplu de lo que supón el nuevu Plan de Xestión de Cuenques Fluviales qu’acaba de poner en marcha’l Gobiernu d’Asturies, porque abarca trés llinies d’actuación: meyora de los edificios de precintaxe, de les instalaciones allugaes nel calce y de les infraestructures destinaes a la repoblación.

Na visita, na que lu acompañó’l director xeneral de Mediu Natural y Planificación Rural, David Villar, Calvo destacó que’l plan nuevu cunta con una dotación de 2,4 millones y la cofinanciación del FEADER. El modelu nuevu afáise a cada cuenca fluvial y ta basáu nos resultaos sacaos del proyectu pilotu puestu en marcha nel 2021 pol Grupu Leader Nalón de Baxo na cuenca del Nalón-Narcea, y les conclusiones de los estudios biolóxicos y de datos realizáu pola Universidá d’Uviéu.

El Plan de Xestión de Cuenques Fluviales tien dos llinies d’actuación estremaes: per un llau, propón el desenvolvimientu d’un modelu d’ordenación y xestión piscícola por cuenques fluviales y, per otru, contempla la execución de llabores de caltenimientu y xestión nos ecosistemes de ribera.

Les primeres actuaciones yá se foron faciendo a lo llargo del últimu trimestre del 2021 con llabores como l’acondicionamientu d’escales pa favorecer el remonte de salmones, l’adecuación de dellos tramos de ribera pa facilitar l’accesu a la Guardería del Mediu Natural y otres alministraciones y la erradicación d’especies invasores como’l plumeru de la pampa, el bambú xaponés o la budleia (Duddleja davidii).

Campaña nueva de repoblación 

La Conseyería de Mediu Rural y Cohesión Territorial empezó va unos díes una campaña nueva de repoblación del salmón atlánticu. Como ye habitual, el llabor del Principáu nestes campañes ye facilitar l’asistencia técnica a les distintes sociedaes collaboradores pa sofitales nos llabores de repoblación col tresporte de xuveniles al pie del ríu usando cubes diseñaes a costafecha pa esti fin.

Nesta mesma llinia, los técnicos de la Conseyería y los axentes de Mediu Natural tán desenvolviendo actuaciones de repoblación usando caxes biodegradables que contienen güévares de salmón y trucha qu’eclosionen dientro del propiu calce. Esti sistema, testáu l’añu pasáu nel Parque Natural de Ponga y n’El Río Ibias (en collaboración cola Sociedá Fuentes del Narcea), da bonos resultaos y apocayá usáronlu tamién los voluntarios de l’Asociación de Pescadores La Socala nel Esva. Les caxes biodregradables tamién van llegar, a lo llargo de les selmanes vinientes, a les demás cuenques salmoneres asturianes.​​​​​​