Categories Navigation

Categories Navigation

El Gobiernu d’Asturies enancha’l camín ente Piedrafita y Grandavil, en Valdés, pa dexar circular a tractores y vehículos pesaos

29/01/2022
  • El conseyeru Alejandro Calvo visita les obres, que se sumen a les yá realizaes en Brieves y Ranón p’ameyorar la so rede viaria
  • Mediu Rural invierte cuatro millones n’ocho concentraciones parcelaries nel conceyu


El Gobiernu d’Asturies ta executando la meyora del camín ente Piedrafita y Grandavil, nel conceyu de Valdés, que cunta con una inversión de 75.000 euros y va dexar ampliar la caxa del vial hasta un anchor d’ente 3,2 y 4 metros pa facilitar el pasu de tractores y vehículos pesaos.

El conseyeru de Mediu Rural y Cohesión Territorial, Alejandro Calvo, visitó güei estes obres, nes que tamién se va anovar el firme cola aplicación de riegu asfáltico y van rehabilitase les cunetes.

El Principáu, al traviés de la Dirección Xeneral d’Infraestructures Rurales y Montes, completó amás la meyora de caminos y pistes nes poblaciones valdesanes de Brieves y Ranón nuna serie d’actuaciones que l’añu pasáu sumaron 80.000 euros.

Mediu Rural ta executando anguaño ocho concentraciones parcelaries nesti conceyu, con una inversión global de cuatro millones. Estes obres, qu’afecten a una superficie total de 2.500 hectárees, busquen revalorizar los recursos d’ún de los conceyos más grandes y con mayor variedá d’usos agrarios y ganaderos na comunidá. Les concentraciones enmárquense n’árees onde predominen les cabañes bovines de lleche y de carne, pero tamién frutales, montes y otres superficies agraries.

D’estes ocho concentraciones, les de Brieves, Ranón y San Fliz entraron yá na fase final del procesu, mentes que les d’Arcayana, Castru, Preda, Viḷḷar, Faéu y Santiagu van facese a lo llargo de los meses vinientes. Valdés va cuntar, polo tanto, con más del 50 % del so suelu útil concentrao a lo llargo del 2023. Esto supón una intervención tresversal que trai provechu pa tola zona al redimensionar el tamañu de les finques. Amás, l’adecuación de la rede de caminos qu’incorporen les concentraciones tamién aumenta’l potencial agrariu, ganaderu y forestal de los terrenos,  de la qu’aumenta’l so valir.

El conseyeru tuvo acompañáu na visita al conceyu pol director xeneral d’Infraestructures Rurales y Montes, Fernando Prendes.​​​