Categories Navigation

Categories Navigation

El Principáu entrega siete viviendes públiques n’Ayer poles que los arrendatarios van pagar un alquiler mensual d’ente 10 y 112 euros

31/01/2022
  • El Gobiernu d’Asturies firmó 550 contratos d’arrendamientu social nel 2021
  • El departamentu qu’encabeza Melania Álvarez caltién como oxetivu entregar 550 cases al añu, lo que supón 2.200 na llexislatura
  • L’Executivu va promover 500 pisos nuevos de renta limitada hasta’l 2026, al amparu de los fondos europeos Next Generation

 

El Gobiernu d’Asturies entregó güei siete viviendes públiques d’arriendu n’Ayer, poles que los arrendadores van pagar una renta mensual d’ente 10 y 112 euros. Los beneficiarios son cuatro persones que viven soles, dos madres con fíos a cargu y una pareya con un fíu.

El Principáu tien anguaño 144 pisos n’arriendu nel conceyu, un parque inmobiliariu curiosu que fixo posible entregar 50 viviendes nos postreros seis años. Amás, nes selmanes vinientes va empezar la rehabilitación d’otres 6 vacies, cola mira d’axudicales nel plazu más curtiu posible.

En total, l’Executivu autonómicu firmó l’añu pasáu 550 contratos d’arrendamientu social en tol territoriu.

La conseyera de Derechos Sociales y Bienestar, Melania Álvarez, que participó nel actu d’entrega de llaves xunto al director xeneral de Vivienda, Fermín Bravo, y l’alcalde d’Ayer, Juan Carlos Iglesias, destacó l’apueste del Gobiernu d’Asturies pola vivienda pública n’arriendu con renta asequible y pol arreglu y axudicación inmediata de pisos sociales. “Xeneremos un cambéu radical nesti ámbitu que nos va dexar entregar 550 pisos al añu, lo que supón más de 2.200 viviendes na llexislatura, una cuestión de muncha relevancia pa garantizar l’accesu a una casa n’Asturies”, valoró. Álvarez tamién resaltó qu’esta política llevóse a cabu gracies a “un modelu de xestión innovador” y a una empresa pública “modélica” como Vipasa.

La política del Executivu autonómicu céntrase na incentivación de la vivienda protexida con renta limitada y compleméntase coles ayudes al arriendu y a la rehabilitación. “Estes midíes consiguieron que’l 95 % de los nuestros pensionistes vivan nun pisu con una tenencia estable y paga dafechu, de manera que namás se detrái de la so pensión el pagu pa la cuota de la comunidá de propietarios y pa los suministros”, esplicó la conseyera. Tamién amestó qu’estos datos contrasten coles cifres de países como Alemaña o Francia, nos que’l 50% de los pensionistes tienen qu’encarar una tenencia insegura de la vivienda. 

El Gobiernu d’Asturies aprobó apocayá la Llei de Garantía de Derechos y Prestaciones Vitales, que va entrar en vigor en xunetu, y qu’incluye instrumentos pa garantizar el derechu d’accesu a una casa digna: el complementu vital de vivienda pa beneficiarios del salariu social, la prestación vital pa vivienda con calter prioritariu de les ayudes d’emerxencia social pa detectar y evitar casos de desallugu y la obligación de los conceyos d’identificar les necesidaes nel so territoriu.  Amás, propón la ellaboración d’una estratexa municipal pa tratar eses necesidaes con medios públicos o privaos.

Fondos Next Generation

La planificación de los fondos Next Generation empobinaos a la promoción de vivienda protexida de renta limitada coincide dafechu cola política del Principáu nesta materia nos postreros 20 años, según apuntó Melania Álvarez. “Por esta razón, vamos ser continuistes nos nuestros planteamientos y estimamos que l’Estáu nos punxere como exemplu pa desenvolver esti programa”, amestó.

Anque entá nun se conocen con precisión los fondos que’l Gobiernu central va tresferir al Principáu p’anguaño y pal añu que vien, calcúlase qu’hasta’l 2026 van promovese alredor de 500 viviendes protexíes nueves de renta limitada con una inversión pública y privada de más de 50 millones.

“Tamos na fase d’identificar les zones con mayor demanda y los terrenos más afayadizos pa la viabilidá económica y social. Nel segundu semestre d’anguaño vamos facer una propuesta d’actuaciones al ministeriu”, avanzó la conseyera de Derechos Sociales. Amás, indicó qu’estes actuaciones van llevase a cabu nes ciudaes más grandes, que son les zones de más demanda, y tamién en delles árees rurales, onde yá se dispón del terrén pa construyir, cola mira d’ayudar a la fixación de población nuevo.​​​​