Categories Navigation

Categories Navigation

El Gobiernu d'Asturies completa la rede autonómica d'urxencies y emerxencies cola UVI móvil nueva del suroccidente

07/02/2022

​​​​​​​

  • El Serviciu de Salú suma otra ambulancia convencional touterrén al área sanitaria II que s'adapta a la orografía y les condiciones adverses nes carreteres.
  • Dambos vehículos, dotaos con personal adscrito, van ufiertar serviciu a los 24.700 habitantes de los conceyos d'Ayande, Cangas, Degaña, Ibias y Tinéu.

El Serviciu de Salú del Principáu (Sespa) punxo güei en marcha una UVI móvil nel área sanitaria II (suroccidente), que va dar serviciu a 24.700 habitantes de los conceyos d'Ayande, Cangas, Degaña, Ibias y Tinéu. Esti recursu nuevu completa la rede d'unidaes de soporte vital avanzáu del Serviciu d'Asistencia Médica Urxente (Samu).

El presidente del Gobiernu d'Asturies, Adrián Barbón, participó güei na presentación del vehículu nuevu xunto col conseyeru de Salú, Pablo Fernández Muñiz; la xerente del Sespa, Concepción Saavedra, y otres autoridaes de la zona.

La unidá móvil va tener base nel Hospital Carmen y Severo Ochoa (Cangas) y va cuntar con un equipu médicu formáu por un médicu, una enfermera y dos técnicos d'emerxencies sanitaries, que cubren turnos de 24 hores. El personal tien formación n'urxencies y emerxencies sanitaries y tamién en técniques de soporte vital avanzáu, como la reanimación cardiopulmonar, l'asistencia a patoloxíes cardiovasculares, respiratories o neurolóxiques graves, asina como nel tratamientu a pacientes traumatolóxicos, pediátricos y xeriátricos.

L'equipu va movese al llugar onde sía necesaria asistencia urxente con un vehículu de tresporte sanitariu que les sos característiques técniques son les d'una UVI móvil o ambulancia tipu C, dotada col material y l'equipu oportunu pa ufiertar atención médica a pacientes graves.

La UVI ta destinada a l'atención de pacientes críticos de riesgu altu, riesgu vital, patoloxíes graves y protocolos como los de los códigos ictus y corazón, amás d'accidentes con múltiples víctimes, de trabayu, de tráficu, o cualquier otra situación clínica grave.

El vehículu, que va depender del Centru Coordinador d'Urxencies, va tar disponible 24 hores, tolos díes del añu, reforzando asina tola rede asistencial médica estrahospitalaria qu'empresta serviciu n'Asturies. Amás, va dexar el treslláu asistíu de pacientes graves ingresaos nel Hospital Carmen y Severo Ochoa que precisen derivación al Hospital Universitariu Central d'Asturies (HUCA) pola so situación clínica o pa ser sometíos a determinaos procedimientos d'urxencia.

Otra manera, el Sespa tamién incorporó al área sanitaria del suroccidente una ambulancia convencional que va complementar los recursos asistenciales actuales. Esti vehículu, xunto cola UVI móvil, dambos touterrén, tán preparaos pa llegar a zones de mal accesu pola orografía y poles condiciones adverses nes carreteres.