Categories Navigation

Categories Navigation

80 empreses participen na 22.ª edición del Puntu d’Alcuentru Internacional d’Asturex

08/02/2022

  • El conseyeru d’Industria inauguró güei’l principal foru de comerciu esterior del Principáu, que busca aumentar el númberu d’empreses esportadores y diversificar mercaos 
  • 24 consultores de la sociedá de promoción esterior van facilitar información a les compañíes sobre 44 países
     

Un total de 80 empreses participen dende güei na 22.ª edición del Puntu d’Alcuentru Internacional de la Sociedá de Promoción Esterior Principáu d’Asturies (Asturex), el principal foru de comerciu esterior de la comunidá, que quier aumentar el númberu de compañíes esportadores y diversificar mercaos. 

El conseyeru d’Industria, Empléu y Promoción Económica, Enrique Fernández, inauguró esti foru (#22PEIAsturex), qu’a lo llargo de dos díes va ufiertar información a les firmes participantes sobre 44 mercaos estranxeros al traviés de 24 collaboradores de la rede esterior d’Asturex. Ta previsto que les empreses tengan alredor de 400 reuniones con ellos.

Fernández punxo en valor el texíu empresarial y el llabor tractor qu’exercen les principales compañíes esportadores. Los últimos datos disponibles reflexen qu’en payares del 2021 Asturies cuntaba con 2.820 empreses esportadores, de les que 621 realizaben operaciones de comerciu internacional davezu. “Contra cualquier pronósticu, nestos tiempos d’inseguranza, les firmes esportadores aumentaron un 42,5 %, y les qu’esporten de forma regular, un 2,3 %”, sorrayó’l conseyeru. 

Ente xineru y payares del 2021, les esportaciones algamaron n’Asturies una cifra de negociu de 4.767,5 millones, peraverada a la del 2019, cuando se rexistró un récord en ventes internacionales na comunidá.

“La internacionalización ye una estratexa bien importante pa la medría de la economía, por eso tenemos que sumar esfuercios y ampliar la base d’empreses esportadores”, indicó’l titular d’Industria.

Puntu d’Alcuentru Internacional

El Puntu d’Alcuentru Internacional quier impulsar el comerciu esterior sofitando les empreses qu’apuesten pola internacionalización como estratexa pa diversificar mercaos y productos y ganar competitividá.

Los empresarios participantes van tener entevistes con 24 collaboradores de la Rede Esterior d’Asturex con presencia en 44 mercaos: Alemaña, Arxelia, Arxentina, Armenia, Austria, Azerbaiyán, Bélxica, Bielorrusia, Bolivia, Brasil, Canadá, Chile, Colombia, Dinamarca, Ecuador, Emiratos Árabes Uníos, Estaos Uníos, Finlandia, Francia, Hungría, Irán, Irlanda, Italia, Xapón, Kazayistán, Kuwait, Luxemburgo, Marruecos, México, Noruega, Omán, Países Baxos, Paraguái, Perú, Polonia, Portugal, Qatar, Reinu Uníu, República Dominicana, Rusia, Suecia, Suíza, Ucrania y Uruguái.

Estos collaboradores van realizar una primer valoración sobre les posibilidaes del productu o serviciu de cada empresa y la manera d’aportar al mercáu nuevu.

Al traviés d’entrevistes individuales, l’equipu d’Asturex va ufiertar tamién información sobre los servicios que da pa sofitar la internacionalización de les empreses asturianes:

  • Servicios de la rede esterior.
  • Asesoramientu xurídicu.
  • Actividaes de promoción internacional (feries, misiones comerciales, foros, etcétera).
  • Programa d’iniciu a la esportación.
  • Programes de desenvolvimientu comercial internacional.
  • Programa de beques.
  • Programa de consorcios.
  • Llicitaciones públiques internacionales.
  • Internacionalización Dixital (Club e-Asturex).

Amás, el #22PEIAsturex va cuntar con puntos informativos d’instituciones rellacionaes cola internacionalización: Grupu Idepa, Cámares de Comerciu, Institutu Español de Comerciu Esterior (ICEX), puertos d’Avilés y Xixón y Compañía Española de Seguros de Creitu a la Esportación (CESCE).