• El procesu d’escoyeta va realizase mediante réxime de concurrencia competitiva y la decisión final va tomala una comisión creada pa la valoración de las candidatures.

La Conseyería de Cultura, Política Llingüística y Turismu abrió'l procesu pa la escoyeta del puestu de la dirección titular de la Orquesta Sinfónica del Principáu d'Asturies (OSPA). El procesu, que se va realizar por concurrencia competitiva, va constar de trés fases y va ser valoráu hasta la decisión definitiva por una comisión creada al efectu.

La resolución aprobada apocayá pol Principáu precisa que la convocatoria tien por oxetu la escoyeta d'una persona para la dirección titular de la OSPA con un contratu de trés años de duración, prorrogable en casu d'alcuerdu.

Ente les funciones de la persona escoyida pal cargu ta la d'ellaborar la programación artística de la temporada de la OSPA, que trai la propuesta de dirección y solistes invitaos, y dirixir ensayos, conciertos, grabaciones y actuaciones, amás de presidir los tribunales de les audiciones pa dar entrada a nuevos miembros de la orquesta.

Tamién tendrá de caltener y aumentar la calidá y el proyectu artísticu de la OSPA nel contestu del nivel artísticu internacional”, según recueye la convocatoria, al envís d'asitiar a la orquesta como referente musical nel panorama européu. Amás, va tener que participar y asesorar nes actividaes educatives y sociales de la formación.

Les candidatures han acreditar una alta conocencia ya interés pol repertoriu musical sinfónicu internacional y pola creación contemporanea, tanto española como universal, demostrao al traviés de los programes que realizaren nesti sentíu. La comisión encargada del procesu d'elección va valorar tamién la participación en concursos internacionales y les reinvitaciones a participar n'orquestes de reconocíu prestíu nacional ya internacional.

Una vegada escosáu'l plazu de presentación de les candidatures, que remata'l 20 de marzu, la comisión de valoración creada pa la elección del puestu va empecipiar un procesu selectivu que va constar de trés fases:

Valoración de méritos y curricular de cada candidatura, que va atender a la esperiencia y los méritos profesionales de los aspirantes.

Valoración de les llinies maestres de cada proyectu presentáu.

Fase d'entrevista, a la que van aportar les trés persones aspirantes que llograren mayor puntuación nes dos fases anteriores. Esta postrera va consistir na presentación del proyectu y nuna prueba na que la comisión de valoración va evaluar l'adecuación, les conocencies, la trayectoria profesional y el restu de los requisitos esixíos, según les habilidaes y les capacidaes comunicatives y de lideralgu de caún de los finalistes.

La convocatoria, publicada güei nel Boletín Oficial del Principáu (Bopa), ta disponible na web de la OSPA, , www.ospa.es. Les persones aspirantes van poder consultar duldes al traviés de la siguiente dirección de corréu: convocatorias@ospa.es