• La resolución yá foi notificada a la fundación que xestiona'l centru​​​​​.

La conseyera d'Educación, Lydia Espina, firmó esta mañana la resolución qu'autoriza’l reallugamientu del alumnáu del colexu San Vicente de Paúl nel Patronatu San José, dambos en Xixón, mientres lo que resta de cursu.

El Principáu entregó la notificación a los responsables de la Fundación Educere, xestora del centru, con mires d'entainar los trámites. El permisu va entrar en vigor a partir de mañana, polo que'l treslláu yá pue ser efectivu'l llunes próximu.

La conseyería entainó los plazos de tramitación del espediente, tal qu’anunciara Lydia Espina, col enfotu de dar una solución rápida al alumnáu del centru qu'empezó'l segundu trimestre en formación telemática. Educación organizó un equipu que tuvo trabayando nel espediente dende la segunda selmana de xineru.

La propuesta de resolución qu'empecipiaba los trámites pal reasitiu firmóse'l pasáu 25 de xineru. Dende esi momentu, la Fundación Educere foi entregando la documentación necesaria pa xestionar l'autorización. L'últimu informe, el del fin de les obres d'adecuación realizaes nel Patronatu San José, rexistróse esti llunes, 7 de febreru.

L'informe final del Serviciu d'Infraestructures de la Conseyería d'Educación señala que la documentación entregada acreita que se cumplen los requisitos mínimos de les instalaciones, d’alcuerdu cola normativa establecida nel Real Decretu 132/2020.

L'Alministración educativa tamién solicitó a los xestores del colexu San Vicente de Paúl l'estudiu qu'encargaron pa conocer l'estáu de la estructura del edificiu que sufrió l'accidente'l 5 de xineru, coles mires de valorar si cumplen les midíes de seguridá pa empezar el cursu próximu nes instalaciones orixinales. Esi proyectu tien qu’aprobalu la conseyería.