​​​​​​​

• El Principáu súmase al Día de la Muyer y la Neña na Ciencia col compromisu d'impulsar les vocaciones nes disciplines STEM
• Solo 9 de cada 100 muyeres qu'estudien una carrera na comunidá opten por una titulación técnica, un porcentaxe que s'amenorga cada añu

El Principáu va incluyir na futura Llei de Ciencia midíes de xéneru p’algamar la igualdá real na I+D+i. El Gobiernu d'Asturies sumóse a les celebraciones del Día Internacional de la Muyer y la Neña na ciencia col compromisu de combatir la fienda de xéneru y fomentar les vocaciones científiques dende edaes tempranes. Solo nueve de cada cien muyeres qu'estudien una carrera n'Asturies opten pel área d'estudios técnicos, un porcentaxe en constante descensu.

La Conseyería de Ciencia, Innovación y Universidá trabaya nel anteproyectu de Llei de Ciencia, na que se va incluyir el xéneru dende una perspectiva tresversal. L'oxetivu ye garantizar el derechu del personal investigador a desenvolver les sos funciones n’entornos de trabayu igualitarios, inclusivos, diversos y seguros. La normativa va siguir l'exemplu de la norma nacional n'aspectos qu'incidan nel sofitu al desenvolvimientu profesional de les investigadores pa que nun abandonen la carrera científica y progresen al mesmu ritmu que los sos compañeros, consiguiendo asina la presencia de muyeres en tolos ámbitos del sistema científicu y tecnolóxicu.

El conseyeru Borja Sánchez fixo fincapié na necesidá d'incluyir la perspectiva de xéneru nel ámbitu de la I+D+i y fomentar les vocaciones científiques dende los niveles educativos tempranos. El titular de Ciencia asistió esta mañana a la llectura del manifiestu pola muyer y la ciencia, la inauguración de la esposición Biografíes de muyeres científiques na biomedicina y la mesa redonda con participación de muyeres investigadores del ámbitu de la salú, actos entamaos pol Institutu d'Investigación Sanitaria del Principáu (ISPA).

Los últimos datos ellaboraos pola Sociedá Asturiana d'Estudios Económicos ya Industriales (Sadei) revelen que la presencia de les muyeres nos ámbitos técnicos sigue siendo minoritaria:

La fienda faise más visible a partir de los estudios de Bachilleratu, onde los homes lideren llixeramente la matrícula en Ciencies.

En Formación Profesional, ciclos superiores como Informática solo cuenten con un 20% de muyeres, ente que n'enseñances como Eletricidá y Electrónica representen el 8% del alumnáu y en Fabricación Mecánica, poco más d'un 5%.

Na Universidá, la muyer representa'l 25% del alumnáu matriculáu n'inxenieríes, pero hai un datu más llamativu: solo'l 9% de les muyeres qu'estudien una carrera opta por una titulación técnica. Esti porcentaxe cayó más de 7 puntos na última década.

El patrón repítese tamién nos estudios de máster y doctoráu venceyaos a la inxeniería y arquitectura, con mayoría masculina.

Nel doctoráu, les muyeres suponen el 51% de les matrícules. En toles disciplines tán percima, salvo nes rellacionaes con inxeniería y arquitectura.

Les muyeres suponen el 40% del personal docente ya investigador, pero esti porcentaxe xube a casi'l 51% ente'l personal contratáu non funcionariu.

Los puestos de trabayu incluyíos nos epígrafes investigación y desenvolvimientu, arquitectura, inxeniería y actividaes técniques tán ocupaos nun 39% por muyeres. Sicasí, el porcentaxe creció y hai cerca de 600 trabayadores más nestos sectores que va diez años.

El compromisu, según el conseyeru de Ciencia, ye avanzar escontra una participación plena de les muyeres na ciencia y combatir la fienda de xéneru en tolos ámbitos de la I+D+i. Pa ello, aseguró, ye mester atraer a más moces a los ámbitos STEM (ciencia, tecnoloxía, inxeniería y matemátiques nes sos sigles n'inglés), onde inda son minoría nes aules.

El Gobiernu d'Asturies yá dio pasos nesti sentíu: por casu, la convocatoria d'ayudes a los grupos d'investigación prima que'l lideralgu del equipu tea en manos d'una muyer. Na última convocatoria, 27 de los 56 equipos que consiguieron financiamientu tán lideraos por científiques. Amás, nel conveniu de la Universidá d'Uviéu p'anguaño incluyóse, dientro del financiamientu por oxetivos, incrementó nun 5% les muyeres caderalgues o profesores titulares.

​​​​​​​

​​​​​​ Audio con declaraciones del consejero de Ciencia, Innovación y Universidad, Borja Sánchez (mp3: 1295797 bytes)