• El Principáu invirtió aproximao 282.000 euros na renovación del verde artificial y la iluminación del campu del fútbol

La Conseyería de Cultura, Política Llingüística y Turismu, al traviés de la Dirección Xeneral de Deporte, invirtió nel añu últimu 408.000 euros en diverses obres de meyora y caltenimientu de les instalaciones deportives d'El Cristo, n'Uviéu. Asina lo señaló güei la conseyera Berta Piñán mientres la visita que realizó al complexu deportivu, acompañada pola directora xeneral de Deporte, Beatriz Álvarez Mesa.

La mayor parte de la inversión destinóse al campu de fútbol, qu'ameyoró'l so sistema d’iluminación con pantalles LED, lo que supunxo un desembolsu de 42.022 euros. Deporte tamién emplegó 36.170 euros nun xuegu nuevu de porteríes de fútbol-7, l'arreglu de los banquinos y la meyora de la grada con barandielles, valles y asientos anovaos.

La obra más ambiciosa foi la renovación del verde artificial del campu de fútbol, rematada'l pasáu avientu, con un costu de 203.714 euros. L'innovador verde artificial de yerba sintético ta diseñáu pa favorecer la durabilidá y ameyorar les prestaciones de xuegu, asina como los protocolos internacionales FIFA Quality Pro. Tamién foi testáu positivamente según la norma UNE-EN 15330-1:2014.

La so estética ye bien similar a la de los terrenos naturales y, amás, el sistema incluye una base y un rellenu elásticu dafechu natural y ecolóxicu a base de corchu específicu pa campos de futbol sintéticu, qu'ameyora l’esgaste, el calentamientu, l'absorción d'impactos y la imaxe, esaniciando la toxicidá de los rellenos d'otros sistemes. Por tanto, tien un componente ecolóxicu importante que lo asitia a la vanguardia de los terrenos con verde artificial d'Asturies.

No que fai al restu de les instalaciones, les piscines tamién s'acondicionaron nel añu últimu. Concretamente, ameyoróse la depuración de les climatizaes, con una inversión de 47.592 euros, y pavimentóse la sala de máquines, con un costu de 15.125 euros. Asina mesmo, invirtiéronse 38.236 euros na meyora del sistema eléctricu y ventilación de la sala de máquines y 2.055 en midíes de seguranza. Al caltenimientu del parqué de les sales y ximnasios dedicáronse 5.959 euros y instaláronse mididores de CO2, de temperatura y de humedanza.

A lo último, Deporte destinó 17.907 euros a delles obres nel esterior de les instalaciones, concretamente a l'adecuación de seguridá en pasareles y circuitos, l'asfaltáu del camín de serviciu y la meyora de la iluminación del complexu deportivu.​​​