Categories Navigation

Categories Navigation

El Principáu va ufiertar teleasistencia 4.0 a les persones mayores de 65 años que viven soles en pisos públicos xestionaos por Vipasa

21/02/2022
  • La empresa de vivienda soscribió un contratu con Cruz Bermeya pa incorporar el serviciu Cúidate +, al que se van destinar 189.000 euros nos tres años vinientes.
  • La conseyera de Derechos Sociales y Bienestar, Melania Álvarez, visitó güei’l centru de llamaes de la ONG, que va atender a partir d’agora alredor de 150 inquilinos.

El Gobiernu d’Asturies va ufiertar teleasistencia domiciliaria 4.0 a les persones mayores de 65 años que viven soles en viviendes públiques xestionaes por Vipasa. La empresa firnó un contratu con Cruz Bermeya pa la puesta en marcha del programa Cúidate +, al que se van destinar 189.000 euros nos trés años vinientes, y que va dar serviciu a 150 inquilinos del parque públicu.

La conseyera de Derechos Sociales y Bienestar, Melania Álvarez, visitó güei’l centru de llamaes de la ONG, onde esplicó que’l Principáu apuesta por sofitar a les persones mayores que viven soles pa que se sientan segures nes sos viviendes y puedan permanecer nelles el máximu tiempu posible. “La nuestra acción nel campu de la vivienda ye indixebrable de les polítiques sociales, lo que nos dexa caltener una coherencia nes midíes y impulsar programes innovadores y pioneros en beneficiu de los inquilinos del parque públicu, como Cúidate +”, indicó.

El serviciu nuevu de teleasistencia nun ye namás el medayón d’alarma que lleven los mayores pa recibir atención a distancia, sinón que va más allá y configúrase como un sistema d’autocuidáu y seguranza que, gracies al siguimientu proactivu de la salú (tensión, pesu, etcétera), dexa ameyorar el bienestar físicu, mental y emocional. Tamién analiza’l modelu de vida en función de les rutines diaries de cada usuariu (tiempu d’estancia en cuartu, nel bañu, fuera de casa, etcétera), detectando de forma proactiva posibles situaciones de peligru. El sistema ta configuráu de tala manera que, ensin tener que calcar nengún botón, s’avise al centru de llamaes de Cruz Bermeya pa que verifique lo que ta asocediendo en casu d’urxencia.

En definitiva, Cúidate + tien por oxetu ameyorar la calidá de vida de les persones mayores que viven soles pa da-yos tranquilidá, fomentar l’autocuidáu, detectar situaciones de riesgu y actuar énte casos d’emerxencia sanitaria o social.

Vipasa y Cruz Bermeya probaron nos últimos años esti serviciu de forma esperimental y, desque se comprobó la eficacia, decidióse implantalu de forma xeneralizada p’asistir a 150 inquilinos del parque públicu. El períodu de prueba ufiertó resultaos concluyentes, porque’l 93 % de les persones que se beneficiaron d’esta ferramienta aseguren sentise más segures, tranquiles y menos soles, y el 100 % considera “perpositiva” esta iniciativa.

“Ye d’estimar que n’Asturies cuntemos con entidaes como Cruz Bermeya, que’l so trabayu ye un exemplu y val pa poner en marcha iniciatives innovadores que dexen a la ciudadanía y a les alministraciones públiques beneficianos d’elles”, valoró Melania Álvarez.

Na visita al centru de llamaes de la organización participaron tamién el director de Vivienda, Fermín Bravo; la xerente de Vipasa, María Montes; el presidente de Cruz Bermeya Asturies, José María Llana, y la secretaria autonómica de la entidá, Eva María Fernández. A xuiciu de la conseyera de Derechos Sociales, el call center ye “un exemplu de meyora continua, bona atención y innovación” y foi clave pa testar el sistema nuevu de teleasistencia.

“Tamos bien arguyosos del nuestru llabor de sofitu al pilotaxe de proyectos que puen convertise en productos con gran potencial nel mercáu. Toi segura de que va haber bien de persones que de forma privada van ponese en contactu con Cruz Bermeya pa instalar tamién esti sistema d’asistencia tan novedosu nes sos cases”, aseguró.