Categories Navigation

Categories Navigation

El Principáu instala en Xixón el primer llaboratoriu d'innovación abierta pa corporaciones, clústeres empresariales y startups

21/02/2022

de izqda. a dcha: Santos Tejón, concejal de Promoción Económica de Gijón; Eva Pando, directora del Idepa; Javier Fernández, director general de Seguridad y Estrategia Digital; Cristina Fanjul, directora del Centro Europeo de Empresas e Innovación; Iván Aitor Lucas, director general de Innovación, Investigación y Transformación Digital; Ana González, alcaldesa de Gijón, y Borja Sánchez, consejero de Ciencia, Innovación y Universidad 
 

  • L'edificiu AS5-HUB del Parque Científicu Tecnolóxicu va acoyer actividaes de compañíes como Microsoft  y va sirvir de sede d'entidaes vinculaes al sector innovador
  • El centru va incluyir un espaciu de prueba y validación de la tecnoloxía 5G, sales de coworking, oficines y árees pa eventos 

El Gobiernu d'Asturies va poner en marcha en Xixón el primer llaboratoriu d'innovación abierta nel Principáu. L'edificiu AS5-HUB, allugáu nel  Parque Científicu-Tecnolóxicu de la Milla de la Conocencia, va sirvir d'incubadora y aceleradora de l'actividá innovadora, y va cuntar col sofitu de grandes compañíes y la presencia de clústeres empresariales.

El conseyeru de Ciencia, Innovación y Universidá, Borja Sánchez, visitó esta mañana l'inmueble, acompañáu pola alcaldesa de Xixón, Ana González, pa ver les meyores nel equipamientu del edificiu, que prevé empecipiar la so actividá nos meses próximos.

Con unos mil metros cuadraos distribuyíos en dos altures, amás d'un garaxe, l'AS5-HUB aspira a asitiar Asturies nel mapa de les comunidaes autónomes españoles con instalaciones pa impulsar, atraer y esportar innovación.

La Conseyería de Ciencia, Innovación y Universidá habilitó esti inmueble como sede pa clústeres y hubs o nodos d'empreses, y startups o pequeñes compañíes innovadores. Amás, l'edificiu va ser un puntu d'alcuentru con compañíes tractores y grandes corporaciones, que van disponer del espaciu pa realizar actividaes. La xestión va correr al cargu del Centru Européu d'Empreses y Innovación (CEEI) y del Institutu de Desenvolvimientu Económicu del Principáu (Idepa).

Na planta baxa, con 525 metros cuadraos, va instalase un Llaboratoriu 5G, una zona d'esperimentación pa la validación d'esta tecnoloxía y la collaboración ente entidaes públiques y privaes. Esta planta tamién va cuntar con zona de coworking, un área pa ensayos de tecnoloxíes innovadores, y sales p'acoyer actividaes de mentorización, formación, xornaes, xuntes, esposiciones y eventos.

La parte superior del edificiu dispón d'una decena d'espacios pa oficines, que van poder ser ocupaes por clusters y empreses. El Cluster TIC, del que formen parte unes 70 empreses, y el Dixital Innovation Hub, van ser les primeres n'establecese nel centru.

Polo que fai a corporaciones y grandes empreses, yá ta confirmada la participación de Microsoft nel edificiu. La presencia d'esti tipu de compañíes va realizase mediante eventos y actividaes. Pel momentu, ta estudiándose la celebración d'un Hackathon d'empreses vinculáu a Microsoft, no que sería'l primer actu públicu esternu.

Anguaño ta negociándose la entrada d'otres compañíes como Futjitsu, Axa y Broker 2000, y clústeres d'empreses vinculaos a distintos sectores innovadores.

El conseyeru de Ciencia destacó l'allugamientu del centru, arrodiáu d'empreses y centros tecnolóxicos, y la cercanía al Campus universitariu de Xixón y a la Escuela Politécnica d'Inxeniería, onde tamién ta instalada la Cátedra Thin5G promovida pol Principáu. “Esti tipu d'iniciatives tienen de sirvir como incubadores y aceleradores de la innovación. Queremos qu'esti centru asitie a la nuestra rexón como un llugar de referencia, onde les empreses puedan amosar los sos productos innovadores, desenvolver actividaes o probar tecnoloxíes”, indicó.

Unu de los fines ye l'impulsu d'iniciatives de sectores vinculaos a la Estratexa d'Especialización Intelixente d'Asturies. Ello ye que l'edificiu lleva'l nome d'AS5 n'alusión a los cinco ámbitos d'esta estratexa rexonal. Por ello, va dase especial atención a los sectores vinculaos a la agroalimentación, enerxía y circularidá, avieyamientu activu y saludable, patrimoniu y biodiversidá, y industria intelixente y resiliente.

Na visita al edificiu tamién asistieron el director xeneral d'Innovación, Iván Aitor Lucas, que trabayó nel diseñu del plan d'acción del centru; el director xeneral de Seguranza y Estratexa Dixital, Javier Fernández (del so departamentu depende'l llaboratoriu d'esperimentación en 5G); la directora del Idepa, Eva Pando, y la directora del Centru Européu d'Empreses y Innovación (CEEI), Cristina Fanjul, una y bones dambes entidaes van ocupase de la xestión y dinamización del llaboratoriu d'innovación abierta.