Categories Navigation

Categories Navigation

El Principáu executa obres de meyora por 535.000 euros na concentración parcelaria de Villazón y nos accesos a Rubial, en Salas

21/02/2022

​​​​​​​ 

  • Dambes actuaciones contribuyen a fortalecer l'actividá nel mediu rural nuna zona de potencial agrícola y ganaderu grande

El Principáu realizó obres de meyora de caminos rurales na concentración parcelaria de Villazón y nos accesos a Rubial, nel conceyu de Salas. Dambes actuaciones, que supunxeron una inversión de 535.000 euros, contribuyen a fortalecer l'actividá nel mediu rural nuna zona con potencial agrícola y ganaderu gran.

Los trabayos vinculaos a la concentración parcelaria de Villazón, a los que se destinaron 450.000 euros, consistieron na creación d'un pasu alternativu pa evitar que'l tráficu de maquinaria agrícola pesada pase pel pueblu. Los llabores realizaos na zona tamién faciliten la xestión de les finques, que pasaron d'un total de 800 a 250, con una media actual d'una hectárea por parcela. Esta intervención favorez l'actividá nel mediu rural, nun área de 250 hectárees de suelos agrarios aptos pal desenvolvimientu de producciones hortícoles y frutícoles.

Pela so parte, les obres de meyora de los accesos a Rubial dexaron acondicionar un tramu d'un quilómetru con una inversión de 85.000 euros. En concreto, reparóse'l firme, creáronse cunetes de formigón y amplióse l'anchor de la vía, al pasar de los 3,20 a los 4 metros, pa dexar el tráficu de vehículos pesaos y tractores.

El director xeneral d'Infraestructures Rurales y Montes, Fernando Prendes, visitó güei en Salas les obres executaes pol so departamentu en dambes zones.