La Sala Borrón acueye Tránsitos, una muestra plástica y sonora de l'artista uvieína Ivana Castañón
- La directora xeneral de Mocedá va inaugurar la esposición mañana a les 19:30 hores
La Sala Borrón acueye Tránsitos, una muestra plástica y sonora de l'artista asturiana Ivana Castañón. La directora xeneral de Mocedá, Diversidá Sexual y Derechos LGTBI, Clara Sierra, va inaugurar mañana a les 19:30 hores la muestra, que va poder visitase hasta'l 1 d'abril, y que forma parte del programa d'esposiciones d’artistes mozos del Principáu p’anguaño.
Tránsitos, que s’articula sobre la esperiencia personal de la mesma autora, entemez la fotografía col arte audiovisual y la música como vehículos d'espresión artística.
Ivana Castañón (Uviéu, 1995) ye graduada en Filosofía y Socioloxía pola Universidá d'Uviéu y cursó los másteres n'Estudios de la Ciencia, la Tecnoloxía y la Innovación y en Formación del Profesoráu. Tamién realizó cursos de pianu, viola, fotografía y cerámica, ente más otros.
La xoven artista participó en diversos proyectos espositivos y musicales. Asina, collaboró cola Orquesta Sinfónica del Principáu d'Asturies (OSPA) nun trabayu sobre'l compositor Modest Músorgski y participó nel CD Deploy your senses Vol. II (2013). Tamién espunxo la so obra na Escuela d'Arte d'Uviéu, l'Espaciu Cultural Atrio de Madrid y el CISLAN de Llangréu. Asina mesmo, protagonizó'l monólogu teatral propiu Malina. Nel 2018 llogró'l premiu Sexualidades y el so proyectu de videuarte Fem-dom llogró'l gallardón Astragal contra la violencia sexista convocáu pola Conseyería de Presidencia nel 2019.
Destaquen tamién los sos trabayos Aquí siempre, curtiumetraxe documental dirixíu por Álvaro Gómez-Pidal y del que Castañón foi productora; Hambre, pieza de videuarte dirixida por ella, y Galatea, cola que llogró'l premiu Nuevos Realizadores Contra la Violencia Sexista. Nel 2020 trabayó en La venus de las pieles, performance con videuinstalación.
