Categories Navigation

Categories Navigation

El Gobiernu d’Asturies va invertir 2,1 millones nel proyectu de saneamientu del ríu Samiguel, en Ribeseya, que se va llicitar en marzu

28/02/2022

​​​​​​​ 

  • El vicepresidente Juan Cofiño destaca que l’actuación va ameyorar la calidá ambiental de la cueva de Tito Bustillo 
  • Mediu Ambiente autoriza a Saint Gobain la conexón col colector industrial d’ Avilés y  va dar el permisu a Fertiberia nos próximos díes

El conseyeru d'Alministración Autonómica, Mediu Ambiente y Cambéu Climáticu, Juan Cofiño, anunció güei na Xunta Xeneral que'l proyectu de saneamientu del ríu Samiguel, en Ribeseya va salir a llicitación en marzu por una cuantía de 2,1 millones. L'actuación va ser tresañal y va distribuyise de la siguiente forma: 500.000 euros en 2022, 1.000.000 en 2023 y 600.000 en 2024.

Esta iniciativa va permitir recoyer les agües residuales de les poblaciones rioseyanes d'El Carmen, Samiguel, Sotu y Pandu, toes na cuenca del ríu Samiguel, y conduciles hasta Sebreñu, que dispón d'una rede de saneamientu que lleva les agües residuales a la estación depuradora de Ribeseya.

Esta actuación supón tamién saniar la cueva de Tito Bustillo, una y bones la obra va permitir que desapaezan los arramaos al Samiguel, agües enriba de la entrada del ríu nal cueva y, por tanto, ameyorar la so calidá ambiental.

Les localidaes que van tar conectaes a esta infraestructura sumen 420 habitantes y el diseñu hidráulicu de la obra va tener en cuenta, amás, les necesidaes de saneamientu del camping, mesmo que l'aumentu d'ocupación que se produz de forma estacional nes viviendes de la zona, lo que significa atender a más de 1.500 persones.

Esta obra completa otres actuaciones apocayá executaes pola conseyería nel conceyu, que tienen relación directa col saneamientu de les poblaciones asitiaes na cuenca del ríu Samiguel. Ente elles, la reforma de la estación de bombéu d'agües residuales de Sebreñu, pasu imprescindible pa siguir desenvolviendo'l saneamientu de la zona, qu'agora va recoyer les agües residuales del previstu colector interceptor del ríu Samiguel.

 

Colector industrial d'Avilés

Per otra parte, el conseyeru adelantró qu'el so departamentu yá unvió a la empresa Saint Gobain l'autorización ambiental integrada (AAI) coles nueves condiciones d'arramáu al colector d'agües industriales de la ría d'Avilés, ente que Fertiberia va recibir nos próximos díes, una vez que les condiciones d'arramáu yá fueron definíes pol Serviciu de Calidá del Agua y tán siendo incorporaes a la nueva AAI, que tamién se modificó pa la so adaptación a les meyores técniques disponibles. Estes dos instalaciones son les postreres que se van incorporar al colector industrial.

“Por tratase de conexones que se realicen nel tramu final d'esta complexa infraestructura, foi necesario que'l colector lleve un tiempu funcionando en réxime normal pa evaluar les interacciones de los arramaos que soporta y adaptar los caudales al respective de los diseñaos primeramente, y poder asina definir correctamente los parámetros d'arramáu”, esplicó Cofiñu.

Tamién precisó que la incidencia medioambiental que xeneren agora les dos industries na masa d'agua de ría ye escasa. Asina, señaló que Saint-Gobain arrama unos 8 llitros por segundu, ente que les agües residuales de Fertiberia pasen primeramente pela depuradora de Maqua. Dambes empreses vienen operando so autorizaciones ambientales integraes con condiciones acordies col mediu al qu'arramen.