• La viceconseyera de Mediu Ambiente avanza que l'usu de biorresiduos va tener especial atención na Estratexa d'Economía Circular
• L'estudiu pa la xestión de los residuos ganaderos conclúi que'l Principáu tien potencial pa delles plantes de biometanización

La viceconseyera de Mediu Ambiente y Cambéu Climáticu, Nieves Roqueñí, afirmó güei que'l Gobiernu d'Asturies ta impulsando la xeneración de biogás dende biorresiduos tales como los residuos sólidos urbanos orgánicos, los residuos orgánicos de la industria agroalimentaria, les deyecciones ganaderes y la folla de depuradora. “Esta midida ye una respuesta afayadiza a los retos que la comunidá encara n'aspectos como la transición enerxética, la economía circular, la protección del mediuambiente y el retu demográficu”, señaló.
 
Na inauguración de la xornada Oportunidaes pal aprovechamientu del biogás xeneráu con residuos orgánicos nel Principáu d'Asturies, Roqueñí indicó que la identificación del potencial de xeneración y aprovechamientu de biogás ye una de les midíes incluyíes na Estratexa de Transición Enerxética Xusta. Tamién precisó que la Estratexa d'Economía Circular, anguaño n'ellaboración, va dedicar especial atención al usu de los biorresiduos y que'l biogás va tener un protagonismu especial. Coles mesmes, sorrayó la propuesta pa estender la biometanización a la folla de la depuradora de Villaperi, n'Uviéu, incluyida nel plan director de saneamientu.
 
Na so intervención, la viceconseyera recordó que'l Consorciu pa la Xestión de Residuos Sólides d'Asturies (Coxersa) foi pioneru en 1986 nel aprovechamientu del biogás del vertideru y aportunó na necesidá d'incrementar la recoyida separada de la fracción orgánica de los residuos municipales pa impulsar la xeneración d'esti gas anovable. 
 
Nes xornaes participaron  tamién la directora xeneral d'Enerxía, Minería y Reactivación, Belarmina Díaz; la directora xeneral de Ganadería y Sanidá Animal, Rocío Huerta; el director xeneral de calidá Ambiental y Cambéu Climáticu, Pablo Álvarez; la xerente de Coxersa, Paz Orviz, y el xefe del departamentu de Bioenerxía y Residuos del Institutu pa la Diversificación y Aforru de la Enerxía (Idae), Julio Artigas, quien esplicó los detalles de la primer convocatoria pa proyectos singulares d'instalaciones de biogás nel PERTE d'enerxíes anovables, hidróxenu y almacenamientu.
 
L'alcuentru, realizáu per vía telemática, cuntó con más de 90 participantes procedentes de los sectores públicos y privaos: empreses gasistes, inxenieríes, cooperatives agropecuaries y empreses del sector agroindustrial, organizaciones agraries, conceyos y compañíes del sector del agua y los residuos.
 
Fueya de ruta pa la xestión de residuos ganaderes
 
Les xornaes sirvieron de marcu pa la presentación del estudiu Fueya de ruta de la xestión de los residuos ganaderos nel Principáu, qu'acaba de rematar la Viceconseyería de Mediu Ambiente. El documentu plantega una reflexón previa sobre la xestión de residuos agrarios y ganaderos que va permitir empobinar el so aprovechamientu enerxéticu.
 
Nesti sentíu, analiza'l potencial del usu del biogás como tratamientu de les deyecciones ganaderes en distintes zones y arrexunta información sobre infraestructures y recursos disponibles, tales como redes de gas, de saneamientu, plantes existentes o la localización d'otros fluxos de residuos. Tamién se creó un sistema d'información xeográfica pa facilitar  la toma de decisiones d'inversión, que se va poner a disposición de los promotores de proyectos interesaos.
 
El documentu constata'l potencial d'Asturies p'acoyer delles plantes de biometanización, amás de les dos actuales, pa xenerar biogás a partir de residuos ganaderos y otros procedentes de la industria agroalimentaria. Tamién reflexa que, anque'l tresporte del residuu a les plantes puede acarretar un problema en términos de distancia y tiempu, ye asumible na mayoría de los potenciales allugamientos. Del testu deduzse, coles mesmes, que la comunidá cunta con una rede d'infraestructures abondo dotada pa facilitar el desplegue d'estos proyectos.
 
Nesti sentíu, el Principáu considera que les ayudes del Plan de Recuperación, Tresformación y Resiliencia que la Idea va poner en marcha llueu suponen una oportunidá pa cofinanciar les inversiones necesaries pa la creación d'instalaciones de producción de biogás o biometanu.
 
La documentación sobre la xornada celebrada güei va tar disponible llueu nel portal de la Rede Ambiental del Principáu.​​​​​​