​​​​​​​

• El Principáu negocia nel MWC de Barcelona un alcuerdu p’acoyer esti eventu nel 2023
• El conseyeru de Ciencia aconceya con representantes de Cellnex Telecom pa rematar un plan pilotu sobre l’internet de les coses cola Cátedra Thin5G

Asturies va optar a ser una de les sedes de la Mobile Week, un eventu centráu nel avercamientu de les tecnoloxíes nueves de conectividá móvil a la ciudadanía. El conseyeru de Ciencia, Innovación y Universidá, Borja Sánchez, participa estos díes nel Mobile World Congress de Barcelona, onde aconceyó con responsables de la fundación qu’entama esti eventu mundial pa estudiar un alcuerdu de collaboración.

La Mobile Week ufierta un espaciu de reflexón y participación sobre la tresformación dixital. Ye ún de los proyectos que promueve la fundación Mobile World Capital (MWC) Barcelona, con ediciones en ciudaes como Málaga, Ourense o Alcalá de Henares, y que xira alredor de conferencies, talleres y actividaes p’averar les tecnoloxíes nueves móviles a la sociedá, amás de valir de puntu d’alcuentru pa empreses punteres nel sector tecnolóxicu.

El Gobiernu d’Asturies mostró l’interés en cuntar con una edición d’esti eventu nel Principáu. Borja Sánchez, acompañáu polos directores xenerales d’Innovación, Investigación y Tresformación Dixital, Iván Aitor Lucas, y de Seguranza y Estratexa Dixital, Javier Fernández, axuntóse con responsables de la Mobile Week p’avanzar na organización d’esta selmana dedicada a la tecnoloxía móvil n’Asturies nel 2023. De momentu, alcordóse la collaboración nel diseñu d’un programa y queden por definir les feches y el llugar onde se va celebrar esti eventu.

El conseyeru aprovechó tamién la visita al Mobile World Congress pa celebrar dellos alcuentros con empreses de telefonía móvil coles que s’avanzó n’alcuerdos de collaboración, como ye’l casu de la compañía Cellnex Telecom.

El Principáu cunta poner en marcha un plan pilotu d’internet de les coses IoT (Internet of Things, nes sos sigles n’inglés) de la mano de Cellnex y vinculáu a la Cátedra Thin5G impulsada pola Conseyería de Ciencia. Trátase d’un proyectu pa probar sensores y software inalámbrico. Esti programa va valir de complementu al desenvolvimientu de la rede LoRa onde trabaya’l Principáu, una rede de comunicación inalámbrica coles torres de TDT que va dexar la conexón y intercambéu de datos ente dispositivos electrónicos.

El conseyeru y los directores xenerales tamién visitaron dellos estands y axuntáronse con representantes de les principales compañíes de telecomunicaciones como Huawei, Vodafone o Nokia.

Asina, esta mañana visitaron l’espaciu 4 Years From Now (4YFN), dedicáu a les startups y onde participen trés compañíes asturianes: Aritium, Solvy y Neosentec, de la mano d’Asturex. Precisamente nesti eventu, dedicáu a les compañíes emerxentes, la directora del Centru Européu d’Empreses y Innovación (CEEI), Cristina Fanjul, participó con una ponencia sobre Asturies como espaciu pal desenvolvimientu de compañíes emerxentes.

Audios del consejero de Ciencia, Innovación y Universidad, Borja Sánchez (n'español)