• L’órganu tien despachos pa un maxistráu y pa un lletráu, amás d’una oficina xudicial pa ocho puestos de trabayu
• La reforma del Palaciu de Xusticia, que ta a puntu de rematase, supunxo una inversión de 107.690 euros

El xulgáu d’Instrucción y Primer Instancia númberu 8 d’Avilés entró güei en funcionamientu, desque remataes les obres d’adecuación de les sos instalaciones y completáu’l so equipamientu. La reforma del Palaciu de Xusticia de la ciudá, que foi na so segunda planta onde s’instaló l’oórganu nuevu, supunxo una inversión de 107.690 euros, ensin cuntar el costu del moblame nuevo.

El xulgáu nuevu ocupa l’espaciu onde enantes s’asitiaben la clínica forense y l’equipu psicosocial, na segunda planta del edificiu. La so creación supón l’apertura d’una oficina xudicial amplia y lluminosa con capacidá pa ocho puestos de trabayu, un despachu pal lletráu y otru pal maxistráu.

La reforma del Palaciu de Xusticia, a puntu de rematar, sigue colos últimos trabayos pa rematar la construcción d’una sala nueva de vistes na planta quinta, una sala de declaraciones de víctimes pal Xulgáu de Violencia sobre la Muyer y otres dos polivalentes nel primer pisu. Estes árees nueves van dexar, ente otros usos, tomar declaraciones y celebrar videuconferencies, porque van disponer del soporte técnicu necesariu.

Pela so parte, yá acabó’l treslláu de la clínica forense y del equipu psicosocial a los espacios nuevos dientro del propiu Palaciu de Xusticia, lo que va dexar destinar a l’asistencia les zones qu’enantes s’utilizaben como archivu. El conteníu yá s’entregó a la empresa axudicataria del contratu de custodia d’archivos xudiciales.

Les actuaciones de reordenación más significatives del Palaciu de Xusticia nuevu foron estes:

• Planta primera: creación de cuatro despachos pa otros tantos forenses, una sala d’espera y un archivu. Habilitáronse dos sales polivalentes.
• Planta segunda: creación del Xulgáu nuevu de primer Instancia y Instrucción n.^u 8, con una oficina xudicial pa ocho puestos de trabayu y despachos pa un maxistráu y un lletráu.
• Planta tercera: habilitáronse dellos espacios d’archivu pa despachos de psicólogu y trabayador social del equipu psicosocial, amás d’una sala d’espera.
• Planta cuarta: va habilitase una zona d’archivu como sala de declaraciones pa muyeres víctimes de violencia de xéneru, cola mira d’aprovechar la proximidá d’esti local col Xulgáu de 1.^er Instancia y Instrucción n.^u 5, que tramita esta clas de procedimientos.
• Planta quinta: creación d’una sala de vistes d’unos 44 m².

Esta intervención forma parte d’un plan ambiciosu del Principáu pa la modernización d’infraestructures, recursos humanos y medios tecnolóxicos de l’Alministración de xusticia al traviés de distintes intervenciones. El proyectu incluye meyores nel Palaciu de Xusticia de Xixón, la renovación del sistema de climatización y illuminación del Palaciu de Xusticia d’Uviéu, el proyectu y construcción del xulgáu nuevu de Pravia nel edificiu vieyu de l’Azucrera, y la rehabilitación del xulgáu de Cangas del Narcea.

N’área de recursos humanos, ta prevista la creación de 17 places anguaño. Amás, van caltenese los nomamientos de personal de refuerzu pa los xulgaos cuando la so situación coxuntural lo precise (clausules suelu, La Pola, Xulgáu de Menores…). Tamién se refuerza’l personal de los equipos psicosociales y de les unidaes de valoración forense Integral con dos places de personal de psicoloxía.