​​​​​​​

• La mesa de contratación propón l'axudicación de 6 de los 8 llotes, a la espera de que Vueling y Volotea xustifiquen les sos ufiertes pa les rutes a Londres y Lisboa, respectivamente.

La mesa de contratación qu'estudia la llicitación pa la promoción d'Asturies nes principales ciudaes europees al traviés de la so conectividá aaérea propunxo l'axudicación de 6 de los 8 llotes ufiertaos, a la espera de que Vueling y Volotea xustifiquen les sos baxes económiques nes ufiertes presentaes pa Londres y Lisboa, respectivamente, onde parten con ventaya respecto al restu de compañíes.

L'aerollinia Ryanair foi propuesta como axudicataria de los llotes 3, 4 y 5, hacia Düsseldorf, Bruxeles y Roma. La empresa irlandesa ufiertó en cada ruta un aumentu del 19% de les places respecto al mínimu esixíu nos pliegos. Ryanair va operar polo menos 2 frecuencies selmanales ininterrumpidamente a los aeropuertos de Düsseldorf-Weeze y Bruxeles-Charleroi. L'aerollinia va incrementar hasta 3 frecuencies selmanales nes temporaes de branu la so operativa col aeropuertu de Roma Fiumicino, que va caltener 2 salíes selmanales el restu del añu.

Pela so parte, Vueling foi propuesta como axudicataria de los llotes 2 y 6, que promocionen Asturies al traviés del so conectividá aérea con París y un destín a escoyer ente Frankfurt, Ámsterdam y Dublín. La compañía presentó una propuesta de conexón cola capital francesa meyor que Volotea, que competía nel mesmu llote. Los enllaces que l'aerollinia yá opera dende payares col aeropuertu de París Orly, el más céntricu de los parisinos, van aumentar progresivamente dende les 2 frecuencies selmanales actuales a les 3 previstes nel branu de 2023, llegando a les 4 salíes selmanales a partir de 2024. La ufierta de Vueling nesta ruta supón una medra del 19% al respective de les frecuencies mínimes esixíes y un 63% al respective de les places globales ufiertaes, al operar con aviones de 220 places.

Vueling tamién foi propuesta como axudicataria del llote 6, al valorar la so propuesta de promoción y conectividá con Ámsterdam pencima de la ufiertada por Ryanair a Dublín. Según la so ufierta, va enllazar Asturies con Ámsterdam a partir de la próxima temporada d'iviernu con ente 2 y 3 salíes selmanales, dependiendo del periodu d'operación, ufiertando amás un 25% más de places sobre'l mínimu esixíu.

A lo último, Volotea propúnxose como axudicataria del llote 8, pa la conexón col aeropuertu de Milán-Bergamo, meyor valorada que la qu'ufiertó Ryanair. Según la so ufierta, Volotea tendrá d'operar 3 salíes selmanales nes temporaes de branu y 2 pel iviernu a partir de la temporada braniza de 2023. La empresa ufiertó una medra del 29% al respective de les frecuencies mínimes esixíes pa tol periodu, lo que supón un 32% más de places adicionales sobre les que demandaba'l pliegu.

A la espera nes rutes de Londres y Lisboa

La mesa de contratación solicitó a Vueling y Volotea la xustificación de la ufierta económica presentada por dos aerollinies nos llotes 1 y 7, de conexón con Londres y Lisboa, respectivamente, por considerales anormalmente baxes dientro de los parámetros comparativos col restu d'ufiertes establecíes nel pliegu.

Dambes aerollinies, que parten con ventaya en cada ún de los llotes pa facese cola axudicación, disponen agora de 10 díes hábiles pa presentar la so xustificación, que va tener que ser analizada pola mesa de contratación.

La propuesta de conectividá de Vueling col aeropuertu de Londres-Gatwick, onde l'aerollinia conecta cola rede de British Airways, aumenta progresivamente les 4 frecuencies iniciales hasta algamar 6 a partir de la temporada de branu de 2024.

Pela so parte, Volotea propón pa Lisboa una programación con 3 salíes selmanales pel branu, que s'amenorguen a 2 pel iviernu.

Les firmes van tener como plazu máximu pa la puesta en serviciu de les rutes a Londres, París, Düsseldorf, Bruxeles, Roma y Ámsterdam l'entamu de la próxima temporada de vuelos d'iviernu y, nel casu de les rutes a Lisboa y Milán, l'entamu de la temporada de branu de 2023.

Xunto colos trabayos pa desestacionalizar y ampliar la conectividá aérea internacional al traviés de la presente llicitación, que supón la materialización de la fase 1 del programa ConnectAsturias, el Principáu caltién conversaciones coles principales aerollinies europees de rede pa siguir ameyorando les conexones del aeropuertu asturianu.