• El xuráu entama la tramitación d’otras trés solicitúes de Tinéu, Les Regueres y Cuideiro

El Xuráu de Clasificación de Montes en Mancomún aprobó la declaración de dos nuevos montes vecinales: el de Pumariega, n'A Veiga, y el de Poles, en Salas. Nel primer casu, onde yá había una parte reconocida, amplióse'l perímetru del monte vecinal, y nel segundu, aceptóse'l pidimientu de la xunta vecinal del pueblu.

Dambos pasaren a engrosar el llistáu de montes vecinales en mancomún, integráu anguaño por 76. D'esta miente, el vecinderu d'estos pueblos va poder disponer *legalmente d'esos terrenes y siguir remanándolos de manera comunal a la manera tradicional. Agora queden pendientes d'ellaboración los planes pertinentes d'usu y xestión pa optimizar la xestión comuñal de los recursos forestales.

Na xunta de güei tamién s'alcordó empecipiar la tramitación d'otres trés solicitúes pa declarar montes vecinales el de La Ponte Castro, en Tinéu, Sotu Les Regueres, en Les Regueres, y Busfríu y Llendepin, en Cuideiru.

Per otra parte, aceptóse'l pidimientu de desistimientu de la xunta vecinal del monte de Quintana, en Balmonte, y tornáronse los pidimientos sobre'l de Sierra de Miño y Forcalláu, en Tinéu, y el de Castañéu, en Valdés, al entender que nun axunten les característiques riquíes pa ser clasificaos montes vecinales. Sobre esti postreru pesa una recién sentencia xudicial que lu declara de titularidá municipal y, por tanto, trabáyase col Conceyu de Valdés pa buscar un modelu de cooperación ente les alministraciones y los vecinos.

Los trabayos del xuráu enmárquénse nel plan de choque del Gobiernu del Principáu pa la clarificación de los recursos forestales, que busca identificar la propiedá de los terrenos, apurrir seguridá xurídica y favorecer los procedimientos de concentración y ordenación de montes públicos y privaos. L'oxetivu ye xenerar riqueza y empléu y favorecer la prevención de les quemes forestales.

El Gobiernu d'Asturies pretende sistematizar estes xuntes y dotales de periodicidá, coal fin de resolver otros 19 espedientes pendientes antes de final d'esti añu, tal que taba previsto.

Nel alcuentru de güei participaron el director xeneral de Planificación, Infraestructures Agraries y Montes, Fernando Prendes; un lletráu de los Servicios Xurídicos del Principáu y dos talos representantes del Colexu d'Abogaos d'Uviéu y de la Unión de Xuntes Vecinales. Coles mesmes, asistieron técnicos de la conseyería y representantes de les xuntes vecinales solicitantes, lo mesmo que de les corporaciones locales afectaes.