• El procedimientu autonómicu adáptase a la declaración del Principáu como zona llibre de tuberculosis bovina ya incorpora el procedimientu de calificación frente a la tuberculosis caprina

Les midíes para la erradicación d'enfermedaes contribúin a mermar les perdes que s'anicien nes esplotaciones, embriven el riesgu para la salú pública y ufierten garantíes sanitaries pa la comercialización

El Gobiernu d'Asturies publicó nel Boletín Oficial del Principáu (Bopa) l'actualización de la normativa que rixe la campaña de saneamientu ganaderu para la erradicación d'enfermedaes.

Esta actualización adapta’l procedimientu autonómicu que rixe la campaña de saneamientu ganaderu a la declaración d'Asturies como zona llibre de tuberculosis bovina. Tamién incorpora'l procedimientu de calificación frente a la tuberculosis caprina.

La resolución establez que la campaña va realizase con calter obligatoriu n'esplotaciones de ganáu vacuno, ovín y caprino, ente les que se va escoyer un muestréu pa realizar la inspección. Tamién se van esaminar les esplotaciones de ganáu caprino que convivan o caltengan una relación epidemiolóxica con grupos de bovín, mesmo que les que produzan lleche o productos lácteos y aquellos establecimientos que voluntariamente acoyese al programa de calificación de tuberculosis.

Tocantes a la especie porcina, van realizase controles serológicos pa la detección de la enfermedá de Aujeszky y muestreos aleatorios de peste porcina clásica y peste porcina africana. Pela so parte, nes instalaciones de acuicultura continental van  facese controles de septicemia hemorráxica viral y necrosis hematopoyética infecciosa. El resolvimientu tamién recueye los requisitos que tienen de cumplir les esplotaciones treshumantes.

La Conseyería de Mediu Rural y Cohesión Territorial va poder decidir, naquelles esplotaciones o zones con alta incidencia de dalguna de les enfermedaes oxetu de la campaña, la investigación d'otres especies de la esplotación susceptibles de careceles.

Les esplotaciones sometíes a la campaña de saneamientu tienen que tar inscrites nel rexistru correspondiente y los animales identificaos individualmente, conforme esixe la normativa reguladora, que tamién establez aspectos tan importantes como los relativos al diagnósticu, periodicidá y desenvolvimientu de les pruebes.

Les campañes de saneamientu ganaderu permitieron qu'Asturies seya zona oficialmente indemne de leucosis bovina enzoótica, brucelosis bovina, brucelosis ovina y caprina, y llibre de perineumonía contaxosa bovina y de tuberculosis. Esta situación permite menguar les perdes económiques aniciaes por diches enfermedaes, embrivir el riesgu pa la salú pública por un descensu de la incidencia de tuberculosis y brucelosis n'humanos y aumentar les posibilidaes de comercialización nos mercaos de ganáu con garantía sanitaria.

Tola información puede consultase nel siguiente enllaz: https://cutt.ly/qAh3Mw1.