El Gobiernu d'Asturies empecipia les obres de meyora de la carretera AS-23, ente Mántaras y A Roda, en Tapia
-
La obres tienen un plazu de cuatro meses y van consistir nel asfaltáu y arreglu d'un tramu de 5 quilómetros.
El Principáu punxo en marcha güei les obres de meyora de la carretera AS-23, que xune les localidaes de Mántaras (Tapia) y Llagar (Castropol), nel tramu de 5,4 quilómetros que separa l'enllaz cola Nu-634 y la localidá d'A Roda. L'actuación, que s'axudicó en 434.299 euros, cunta con financiación del Fondu Européu de Desenvolvimientu Rexonal (Feder).
L'AS-23 ye una importante exa de comunicaciones comarcal, tanto pa la zona interior del propiu conceyu de Tapia como pa dar accesu a la carretera N-634 y a l'autovía del Cantábrico, dexando la movilidá escontra estes víes dende les comarcales AS-31 (As Figueiras- A Roda), AS-32 (Tol- Serantes) y otres víes d'ámbitu local.
La meyora d'esta exa comarcal va facilitar la movilidá de los habitantes del mediu rural, reforzando la seguridá y fiabilidá de la vía nos sos desplazamientos.
Les obres van consistir na llimpieza y el fresao de la vía p'aplicar, darréu, dos capes d'asfaltu: una de regularización y otra de rodadura de 5 centímetros d'espesura.
Amás, tamién tán previstes actuaciones p'ameyorar el drenaxe de la carretera. Ente elles, destaquen l'allongamientu de dos caños, la sustitución d'otru, la execución de drenaxe soterrañu y la construcción de 380 metros de cuneta de tipu bordiellu y otros 230 metros de cuneta tipu ‘V’. A lo último, van reponese les balices y va anovase la señalización vertical y horizontal del vial nel tramu.
