Categories Navigation

Categories Navigation

El Principáu impulsa'l concursu musical FestiAMAS pa promocionar el trabayu de mocedá artista asturiano

07/03/2022

s​​​​​​ 

  • Va poder participar cualquier grupu, con independencia del so estilu, siempre que polo menos ún de los sos componentes tenga menos de 35 años.
  • El premiu consiste nuna actuación por un caxé de mil euros y la edición d'un CD.

L'Institutu Asturianu de la Mocedá financia una nueva edición del concursu musical y del programa televisivu FestiAMAS, coles mires de promocionar ya impulsar el trabayu de mocedá creadora y grupos asturianos. Les bandes y artistes que se presenten nel certame tienen de cuntar con siquiera un componente menor de 35 años.
FestiAMAS ye un concursu en directu que s'emite al traviés de TPA, de mou que s'espubliza na pequeña pantalla'l trabayu de los grupos y músicos y ufiérta-yos la oportunidá de tocar en directu nos meyores escenarios de la comunidá. El premiu pa la banda ganadora va ser una actuación nel conceyu onde fuera escoyida, por un caxé de mil euros, y la grabación d'un CD Jewelbox qu'inclúi 50 hores d'estudiu y 30 hores de mezcles y masterización.

La directora xeneral de Mocedá, Diversidá Sexual y Derechos LGTBI, Clara Sierra, presentó güei la edición d'esti añu, cola que se van algamar siete semifinales y ocho programes de televisión, incluyida la final dientro del programa de les fiestes de San Mateo, n'Uviéu. La Conseyería de Presidencia, al traviés del Institutu Asturianu de la Mocedá subvenciona'l festival con 18.000 euros.

Nos sos nueve primeres ediciones, FestiAMAS convirtióse nun circuitu de referencia en constante crecimiento de participación y sedes y caltién los oxetivos de dar visibilidá y sofitu a les bandes d'Asturies, ufierta-yos la posibilidá de tocar en directu y apurri-yos una ventana en televisión, contribuyendo asina al espardimientu de la cultura rexonal. Participen como patrocinadores del festival Caxa Rural, Radior Televisión del Principáu y los conceyos d'Uviéu, Valdés, Navia, Tapia de Casariego, Pravia, Cangas, Castrillón y La Ribera.

Na primer edición del concursu inscribiéronse más de 60 grupos y en 2021 la cifra d'inscritos algamó los 184.

La gran final n'Uviéu constitúi ún de los premios más valoraos por grupos y músicos, al implicar l’actuación nun escenariu emblemáticu. En 2021 tocaron en directu na capital del Principáu Secta, Mardom, Diañu Blues, Arek, Disaster Sister, Sake y Diligence

Nes ediciones anteriores resultaron ganadores Ofensivos, Ofensivos, Zombie Dolls, Hammercross, Swap, La Kasmhir, Arnia, Drunken Buddha, Nuevecondiez y Secta.


Audio (666,142 Kb)