Categories Navigation

Categories Navigation

El Gobiernu d’Asturies abre’l procesu pa impulsar la industria espacial venceyada a la meyora de les telecomunicaciones

07/03/2022
  • La Conseyería de Ciencia empecipia'l programa de compra pública innovadora con una consulta al mercáu dirixida a empreses y consorcios
  •  Principáu llanza dos retos: la creación d'un bancu d'ensayos pa motores de cohete y un bancu de pruebes pa nanosatélites

El Gobiernu del Principáu empecipió'l procesu de compra pública d'innovación (CPI) pa desenvolver la industria aeroespacial enfocada a la meyora de les telecomunicaciones n'Asturies. La Conseyería de Ciencia llanzó esta mañana una consulta pública al mercáu con dos retos: la creación d'un bancu d'ensayos pa motores de cohete y un bancu de pruebes pa nanosatélites, que tien como fin últimu poner n'órbita un dispositivu.

El conseyeru de Ciencia, Innovación y Universidá, Borja Sánchez, y el director xeneral d'Innovación, Iván Aitor Lucas, participaron nuna presentación telemática, xunto cola consultora Ayming, pa esplicar les claves d'esti proyectu a les empreses del sector interesaes.

L'oxetivu ye abrir nueves oportunidaes de mercáu nel ámbitu de les telecomunicaciones, atraer la industria espacial a Asturies, xenerar más conocencia y desenvolvimientu tecnolóxicu nesti sector y captar financiación de l'Axencia Espacial Europea. El primer pasu ye pescanciar propuestes pa los dos retos que plantega l'Alministración autonómica y que, darréu, van salir a llicitación pública. Son los siguientes:

  • Bancu d'ensayos móvil pa motores cohete. La industria espacial ta evolucionando hacia un nuevu modelu, conocíu como New Space, que precisa pequeños llanzadores pa satélites que dexen flexibilidá d'operaciones y mayor frecuencia. L'oxetivu ye llograr capacidá pa realizar pruebes de cohetes nun bancu d'ensayos cualificáu pola Axencia Espacial Europea (ESA) que seya tresportable, con sistema de monitorización y control intelixente.
  • Bancu de pruebes pa nanosatélites. El propósitu ye testar la capacidá d'orientación de los nanosatélites pa redes espaciales de sofitu al 5G d'alta eficiencia n'unes instalaciones qu'asemeyen l’entornu espacial adecuadamente y permiten  facelo a un menor costu que les soluciones tradicionales pa grandes satélites. El fin últimu ye'l llanzamientu d'un nanosatélite. 

Nel futuru, pretende cubrise necesidaes como la monitorización del caudal de ríos, el siguimientu de fauna selvaxe, la recepción de datos meteorolóxicos, la supervisión de ganáu, la evaluación de cultivos y el control de la orientación de los nanosatélites, que permite desplegar redes más versátiles acordes coles necesidaes del 5G.

“Ún de los grandes oxetivos que queremos algamar  ye asitiar Asturies ente les comunidaes puxantes na industria espacial, no que se denomina New Space, y dotar la nuesa comunidá de tecnoloxíes de les qu'agora escarez”, esplicó'l titular de Ciencia. Pel momento, Galicia, Cataluña, Andalucía y Madrid son les comunidaes onde s'impulsó esti sector.

Ente les oportunidaes que la compra pública innovadora ufierta p'Asturies destaquen meyores na tecnoloxía 5G, ciberseguridá, sofitu pa redes d'emerxencia, mapéu xeográficu con imáxenes d'alta calidá y oportunidaes de negociu pa les empreses. Amás, va implicar el desenvolvimientu de nueva tecnoloxía venceyada a la industria de materiales, propulsión o combustibles espaciales verdes.

Sánchez destacó que'l Principáu nun parte de cero, pos yá se punxeron en marcha proyectos como la cátedra Thin5G, la rede inalámbrica LoRa, de banda estrecha pa iniciatives venceyaes al internet de les coses; el centru d'innovación abierta en Xixón, y tol potencial n'investigación venceyada al espaciu que tien la Universidá d'Uviéu. 

Los detalles de la consulta preliminar van publicase nel Perfil del Contratante de la Conseyería de Ciencia, dientro del apartáu de consultes preliminares, y va abrise el plazu de presentación de propuestes hasta'l 28 de marzu. Darréu, va empecipiase una llicitación pública.