El Principáu pon en marcha la unidá de convalecencia de la Residencia Mixta, en Xixón, depués d’una inversión de 264.000 euros
- El recursu empieza a dar serviciu con 15 places, que van aumentar progresivamente hasta 26, pa ufiertar una atención amañosa a persones mayores que, depués de recibir l’alta hospitalaria, riquen cuidaos complexos
- La conseyera de Derechos Sociales destaca que esti dispositivu nuevu implica un avance fundamental na meyora de la calidá asistencial
El Gobiernu d’Asturies punxo güei en marcha la unidá de convalecencia de la residencia Mixta, en Xixón, depués d’una inversión d’alredor de los 264.000 euros. Esti dispositivu va dexar ufiertar una atención afayadiza a persones mayores que, en recibiendo l’alta hospitalaria, riquen cuidaos más complexos que los que se garanticen nuna plaza temporal d’un recursu sociosanitariu.
La conseyera de Derechos Sociales y Bienestar, Melania Álvarez, visitó esta mañana esti recursu, allugáu na quinta planta del centru polivalente de recursos Mixta, que va empezar a funcionar con 15 places y progresivamente va llegar a ufiertar 26. Esta residencia, la mayor d’Asturies, va cuntar con un equipu de 18 profesionales: 6 enfermeres y 12 técnicos auxiliares d’enfermería p’atender les persones ingresaes na unidá nueva. Los pacientes tamién van disponer d’atención médica y asistencia por trabayadores sociales y otros profesionales que yá dan serviciu nel centru.
El procesu de valoración pal ingresu na unidá va empezar esta selmana y les persones mayores que la precisen van poder acceder yá a esti serviciu nuevu.
“La unidá supón un avance fundamental na meyora de la calidá asistencial y un exemplu más del compromisu del Gobiernu d’Asturies cola protección y el cuidáu de les persones más vulnerables”, destacó Melania Álvarez. Al so xuiciu, la creación d’esti dispositivu, prevista nel Plan Sociosanitariu del Principáu, supón tamién un bon exemplu de la coordinación afayadiza ente los servicios sanitarios y sociales de la comunidá.
Ufierta de places residenciales
L’organismu autónomu Establecimientos Residenciales p’Ancianos d’Asturies (ERA) dispón de 5.758 places: 3.317 de xestión pública directa, 328 de xestión indirecta y 2.113 concertaes. En concreto, xestiona directamente 26 residencies, 8 de forma indirecta y 3 bloques d’apartamentos. Tocante al conceyu de Xixón, hai 1.399 places residenciales públiques: 804 de xestión directa y 595 concertaes.
L’ERA remana anguaño un presupuestu de más de 164,6 millones, lo que supón un aumentu del 4,2 % na inversión en capital humano al respective del 2021. Pela so parte, el gastu en bienes corrientes y servicios aumentó un 2,23 %.
Pela so parte, la Mixta dispón esti exerciciu de cuasi 2,5 millones pa la obra de reforma de la fachada que, amás d’una meyora a nivel urbanísticu, va llograr tamién una mengua del 30 % del consumu d’enerxía nel inmueble y va aumentar el confort de les persones residentes. Los fondos pa esta actuación tán vinculaos al Plan d’Impulsu a la Recuperación d’Edificios Públicos (PIREP).
El diseñu del proyectu va axudicase llueu y, de siguío, van salir a llicitación les obres.
