• Esta iniciativa va concurrir  al Programa Experiencies Turismu España, financiáu colos fondos Next Generation EU
• Asturies coordina les acciones comprendíes nesti marcu de collaboración turística formáu con Galicia, Cantabria y el País Vasco 

 Les cuatro comunidaes que conformen la España Verde decidieron presentar un proyectu conxuntu que-yos permita convertise nel mayor corredor d’ecoturismu d'Europa. Pa ello, van ufiertar esperiencies turístiques sostenibles dientro de los espacios naturales protexíos de Galicia, Asturies, Cantabria y Euskadi.

Esta iniciativa, que va concurrir al programa Experiencia Turismu España, representa una inversión d’alredor a los 800.000 euros que se va destinar a la creación d'una rede d'axentes collaboradores nel territoriu, la formación a empreses y xestores de recursos, el diseñu y creación d'esperiencies, productos y servicios basaos en modelos verdes y sostenibles, mesmo que la producción de recursos pa llevar a cabu la difusión del proyectu. Pala so execución, España Verde va cuntar col trabayu de l'Asociación de Ecoturismu d'España.

Los representantes de les cuatro comunidaes tomaron esta iniciativa esta mañana en Llaboral Ciudá de la Cultura (Xixón). Trátase de “el mayor apueste turísticu plantegada pola España Verde nel so conxuntu nos sos más de 30 años de vida”, según manifestó la viceconseyera de Turismu del Gobiernu d'Asturies, Graciela Blanco. Nel alcuentru, tamién participaron la directora xeneral de Turismu de Cantabria, Marta Barca; el viceconseyeru de Comerciu y Turismu d'Euskadi, Jesús María García de Cos; y la directora de Turismu de Galicia, María Nava Capo, acompañaos de técnicos de turismu y marketing de les cuatro comunidaes.

Na xunta avanzóse tamién nel programa d'acciones promocionales d'España Verde, qu'en 2022 va cuntar con un presupuestu de 400.000 euros (el doble que n'años precedentes). Viaxes de periodistes, blogueros y turoperadores, campañes dixitales, asistencia a feries especializaes y la edición de la nueva guía La Gran Ruta de la España Verde son dalgunes de les acciones que se van llevar a cabu esti añu pa reactivar el turismu internacional nes cuatro comunidaes. Naturaleza, senderismu y cicloturismu destaquen ente les propuestes temátiques nes que se desenvuelve'l programa operativu d'España Verde pal presente añu.  

España Verde La marca territorial 

España Verde foi llanzada en 1989 por Galicia, el Principáu d'Asturies, Cantabria y Euskadi col sofitu de Turespaña. El so oxetivu ye asitiar la cornisa cantábrica como destín turísticu alternativu nel mercáu internacional, reforzando la so imaxe de marca y promocionándose como destín únicu. La España Verde ye líder nacional en naturaleza con 14 Reserves de la Biosfera de la UNESCO, 25 parques naturales, casi 2.000 kilómetros de mariña y 2.800 agospiamientos rurales. 
El Gobiernu d'Asturies asumió la coordinación de la marca nesti añu