El Gobiernu d'Asturies va asumir en xunu la esplotación de la depuradora de San Cloyo, n'Uviéu
- Mediu Ambiente tramita, al traviés de Cadasa, la llicitación del contratu por 5,5 millones y un períodu de cuatro años
El Gobiernu d'Asturies prevé asumir a partir del 1 de xunu la esplotación de la estación depuradora d'agües residuales (Edar) de San Cloyo, nel conceyu d'Uviéu. Asina lo anunció güei la viceconseyera de Mediu Ambiente y Cambéu Climáticu, Nieves Roqueñí, mientres la visita que realizó a la planta xunto cola directora xeneral del Agua, Vanesa Mateo.
La Conseyería d'Alministración Autonómica, Mediu Ambiente y Cambéu Climáticu sacó a llicitación, de forma conxunta y al traviés de Cadasa, el contratu pa esta depuradora y la de Villaperi con un importe de 21.8 millones y un periodu de cuatro años. Del total de la inversión, 5,5 millones correspuénden-y a la de San Cloyo.
Esta instalación qu'entró en funcionamientu en 1995, forma parte del sistema de saniamientu de la cuenca del ríu Nora, na zona central d'Asturies, y da serviciu a una parte del conceyu d'Uviéu. Anque foi diseñada con una capacidá máxima de tratamientu de 220 llitros/segundu y p'atender a una población non superior a los 20.300 habitantes, nel 2021 la sociedá estatal Agües de les Cuenques d'España (Acuaes) realizó obres d'ampliación qu'aumentaron la so capacidá de tratamientu a los 1.300 llitros/segundu pa emprestar serviciu a una población de 129.000 persones.
El costu de l'ampliación xubió a 14 millones, el 65 % de los cualos financiáronse al traviés del Fondu de Cohesión de la Unión Europea del periodu 2007-2013, mentes que'l Principáu asumió'l restu de la inversión.
El conveniu firmáu con Acuaes pa la execución d'estos trabayos incluyó la esplotación mientres cinco años de la depuradora y precisaba que, tres esi periodu, la xestión pasaría al Gobiernu asturianu.
El pliegu pal contratu de llicitación concede un pesu importante a la de valorar les ufiertes a les iniciatives en materia d'innovación y investigación, en coherencia coles directrices del Plan Director de Saniamientu del Principáu, anguaño en trámite d'información pública. Asina, van valorase actuaciones d'I+D+i consideraes prioritaries nel plan, como la economía circular, la prevención d'alivios o l'amenorgamientu de la buelga de carbonu. Con anterioridá yá se tuvo en cuenta la innovación, al incluyir un tratamientu pioneru de los golores, cola eliminación de los mesmos per aciu de la vía biolóxica.
El contratu incluye la xestión tanto de la depuradora como de los colectores y toles instalaciones asociaes.
Cola asunción de la esplotación de dambes estaciones, el Principáu recupera la depuración de toles agües d'Uviéu, lo mesmo que de gran parte de los conceyos del área central d'Asturies.
