• El Principáu presenta a l'Alianza poles Infraestructures una actualización del estáu de les obres qu'executa'l Gobiernu central
• L’avance de la variante de Payares, la inversión na rede de cercaníes y l’aumentu de les bonificaciones del peaxe del Güerna son dellos de los fitos más importantes de los últimos meses

La Conseyería de Mediu Rural y Cohesión Territorial presentó güei l'actualización de les distintes obres que'l Gobiernu central tien en marcha n'Asturies na xunta telemática de l'Alianza poles Infraestructures. El Principáu informó sobre la situación de caún de los finxos marcáos nel últimu alcuentru d'esti foru, el pasáu xunu, y aseguró que los defenderá na xunta prevista pal día 29 col secretariu d'Estáu d'Infraestructures, Xavier Flores.

Ente estes meyores, el conseyeru Alejandro Calvo y el viceconseyeru d'Infraestructures, Movilidá y Territoriu, Jorge García, destacaron el pasu del primer tren pela variante de Payares como ún de los fechos más destacaos de los últimos meses. Amás, refiriéronse a l'alquisición de 20 locomotores de mercancíes y al entamu del procesu d'homologación d'otres 15 de bien alta velocidá y anchu variable, destinaes al tráficu de pasaxeros, que van permitir la llegada de l'alta velocidá a Uviéu y Xixón n’abriéndose la variante.

Tocántenes al plan de cercaníes, púnxose de manifiestu que'l presupuestu qu'anguaño va recibir Asturies del Executivu central pasa de 71 a 96 millones, lo que supón un 20% más. Tamién s'aludió a los más de 220 millones que se tán movilizando ente la meyora de la infraestructura y l'alquisición de nuevu material rodante, col compromisu de Renfe Anchu Métricu de destinar al Principáu 10 nuevos trenes eléctricos y otros 5 modelos híbridos.

Otramiente nel alcuentru abordáronse les fases de tramitación que se consolidaron nel desenvolvimientu del plan de víes de Xixón, la situación de les obres del soterramientu ya integración ferroviaria de Llangréu y Llaviana, con contratos por valor de casi 50 millones.

En materia de carreteres, l'Alianza trató les nueves bonificaciones que se van poner en práctica na autopista del Güerna, que van llegar al 40% en vehículos pesaos y van superar el 50%, a partir del tercer trayectu nel mesmu mes, p'automóviles llixeros. El desenvolvimientu de les obres de l'A-63 en Casazorrina y La Barrosa, que van tar concluyíes en payares de 2023, foi otru de los temas abordaos.

A lo último, analizóse la situación d'otres infraestructures de titularidá estatal, como los proyectos d'accesu al Puertu d'El Musel dende la Zalia, Veriña, Xove y l'autovía del Cantábricu.

L'Alianza poles Infraestructures surdió va cinco años col sofitu de casi una ventena d'organizaciones sociales como la patronal, los sindicatos, les cámares de comerciu y el respaldu del PSOE ya Izquierda Xunida. Tiempu depués sumáronse'l restu de grupos políticos con representación na Xunta Xeneral