El Principáu impulsa'l proyectu L'Aldea 0 pa llevar la economía del sieglu XXI al mediu rural
- El proyectu pilotu, diseñáu xunto con CTIC Centru Tecnolóxicu, busca la viabilidá comunitaria, económica y ecolóxica d'estes poblaciones
- La iniciativa, dotada con 725.000 euros, va poner en marcha un paquete de midíes pa promover la rehabilitación de la cultura del territoriu y fomentar la innovación tecnolóxica y social
- El modelu va aplicaser de manera esperimental en Mual, Asiegu, Porrúa y Pion
El Gobiernu d'Asturies va poner en marcha'l proyectu L'Aldea 0 col que pretende llevar la economía del sieglu XXI al mediu rural pa evitar la despoblación y garantizar el futuru d'estos territorios. La iniciativa, diseñada a comuña pola Conseyería de Mediu Rural y Cohesión Territorial, el comisionáu pal Retu Demográficu y CTIC Centru Tecnolóxicu, va aplicar un paquete de midíes nel bieniu 2022-2023 con un presupuestu de 725.145 euros, de los que 578.947 va apurrilos el Ministeriu pa la Transición Ecolóxica y el Retu Demográficu y 146.197, CTIC.
L'oxetivu d'esti proyectu ye encarar la llucha contra l'abandonu de les poblaciones rurales pequeñes pa convertiles en llugares afayadizos pa trabayar y morar. L'Aldea 0 promueve la busca d'una nueva viabilidá socioeconómica basada na recuperación de l'actividá local, la calidá de vida, el caltenimientu de conocencies esenciales pa la xestión del territoriu, la integración de les tecnoloxíes y el desenvolvimientu de nueves funciones. Pa consiguilo, tienen de definise nuevos paradigmes económicos y ecolóxicos y preseos novedosos d'intervención pública-privada que van tener qu'esperimentase por mediu de prototipos nes mesmes aldees.
Esta iniciativa, concebida como un ensayu pilotu, prevé'l desenvolvimientu de delles actuaciones pa promover la rehabilitación de la cultura del territoriu y fomentar la innovación tecnolóxica y social cola fin de poder retrucar nel futuru los resultaos llograos.
Actuaciones previstes
Les midíes van desenvolveser nel marcu de los siguientes ámbitos d'intervención:
- Sistema agroecolóxicu local. Diseñu, viabilidá y organización de fórmules pa la implantación de rebaños conceyiles, comuñales o cooperativos como xestores integrales del territoriu, y de los productos autóctonos (ejemplificados na sidra), al traviés de procesos que garanticen y visibilicen la so trazabilidá.
- Sistema enerxéticu local. Creación d'una comunidá enerxética rural como elementu demostrador dende la perspectiva tecnolóxica y social (modelu de consumu colectivu).
- Sistema local d'empreses. Trátase de facer parte a la comunidá local nun programa d'innovación abierta pal mundu rural.
- Comunidá interxeneracional. Programa y espacios d'alcuentru que promuevan l'aprendizaxe interxeneracional, la esperimentación y la recuperación de la cultura local.
- Actualización y tresmisión de la cultura rural. Revalorización de la cultura local (Porrúa y Pion) por mediu de la promoción de nueves fórmules d'almacenar, tresmitir ya hibridar el conocimientu tradicional con innovación pa revitalizalo.
Estes actuaciones van aplicase por mediu d'intervenciones en entidaes locales de población pequeñes -parroquies rurales y aldees- de cualquier puntu de la xeografía rural. Primeramente, tán previstes midíes esperimentales nes aldegees de Mual (Cangas del Narcea), con 85 habitantes; Asiegu (Cabrales), con 92 habitantes; Porrúa (Llanes), con 419 habitantes, y Pion (Villaviciosa), con 392.
El conseyeru de Mediu Rural y Cohesión Territorial, Alejandro Calvo, presentó esta mañana'l proyectu L'Aldea 0: diseñu, ensayu y esperimentación d'un modelu socioeconómico pa l'aldea del sieglu XXI, xuntu col comisionáu pal Retu Demográficu, Jaime Izquierdo; el presidente y director xeneral del CTIC Centru Tecnolóxicu, Roberto Paraja y Pablo Priesca, respectivamente, y l'alcalde de Villaviciosa, Alejandro Vega.
