• La inversión prevista nos Proa+ y los contratos-programa pa esti añu supera los trés millones

• La conseyera Lydia Espina destaca que’l desarrollu d’estos planes “configura un sistema más xustu ya igualitariu”

La Conseyería d'Educación firmó güei con responsables de 93 centros educativos los programes pa fomentar la equidá na enseñanza asturiana, nun actu celebráu n'Uviéu. La inversión prevista pa esti añu supera los trés millones.

Per una parte, la conseyera Lydia Espina robló los programes Proa+ coles direcciones de los 79 centros que van desenvolver esta iniciativa, que tien por oxetu algamar l'éxitu escolar del alumnáu, poniendo'l focu especialmente en quien que s'atopa en situación de vulnerabilidá educativa. D’otra miente, nel actu firmáronse 20 contratos-programa con centros educativos, destinaos a la promoción de la equidá y a dotar al alumnáu de recursos adaptaos a les sos necesidaes. Seis centros escolares van participar en dambos planes.

Nel casu de los Proa+, van enllargase trés cursos, hasta l'añu académicu 2023-2024, y van tener una inversión global de casi 9 millones. Esta midida, que se desenvuelve nel marcu 21 del Mecanismu de Recuperación y Resiliencia, implica per primer vez la contratación de personal, beneficia mesmo a la rede pública que a la concertada y prima la ruralidá como criteriu. La conseyera d'Educación señaló na so intervención que'l programa “va configurar un sistema educativu más xustu, igualitariu y equitativu”.

Al respective de los contratos-programa, Lydia Espina indicó que s'anueven los que yá tán en marcha, al nun haber dengún de nueva incorporación, porque ye l'últimu añu d'esta modalidá que se financia con cargu a al Ministeriu d'Educación y Formación Profesional y ta cofinanciada pol Fondu Social Européu (FSE). 

La titular d'Educación recordó que los contratos-programa fueron claves pa qu'Asturies “llograra amenorgar y prevenir el fracasu escolar y l'abandonu educativu tempranu” nos últimos años, amás de cumplir colos Oxetivos Europeos 2020. “Estos programes, que pa la nuesa comunidá yeren más ambiciosos que pal restu del país, fueron ferramientes bien válides, que nos ayudaron a encauzar les nuestres práctiques educatives y a incrementar l'éxitu escolar”, valoró la conseyera.

Per otru llau, tamién mostró la so satisfacción pola asistencia al actu de la firma de los responsables de casi un centenar de centros educativos, a los qu’agradeció'l so llabor y, por estensión, la del profesoráu “que la so implicación ye un requisitu fundamental pa  qu’estos programes salgan alantre con éxitu”.

Declaraciones de la consejera de Educación, Lydia Espina (mp3: 1 Mb)

Listado de centros (pdf: 59 Kb)