Categories Navigation

Categories Navigation

El Principáu considera que'l PERTE del naval va permitir a los estelleros asturianos consolidar el so futuru y afitar el so nivel d'innovación

16/03/2022
  • “Ye una bien bona noticia pal sector”, valora'l director xeneral d'Industria
  • “Supón un aliciente p’afondar nel apueste pola tresformación dixital o la eficiencia enerxética y refuerza les posibilidaes de contratación con nueves víes de financiamientu”, sorraya Juan Carlos Aguilera

El Gobiernu d'Asturies valora l'aprobación del Proyectu Estratéxicu pa la Recuperación y Tresformación Económica (PERTE) para la industria naval, porque va afitar el nivel competitivu de los estelleros asturianos y dexará-yos caltener l'apueste pola diversificación en nuevos sectores d'actividá.
 
El director xeneral d'Industria, Juan Carlos Aguilera, destaca que la industria naval ye un sector que, amás de tar realizando un gran trabayu y vivir un bon momentu de contratación, xenera empléu de calidá y, nel casu d'Asturies, ta fuertemente venceyáu al territoriu. “Gracies al PERTE, puede ver consolidáu'l so futuru, demostrando un pulsu inversor bien importante, completando los 310 millones aportaos pol Ministeriu d'Industria con otros 1.150 d'inversión privada”, indicó. 
 
Al so xuiciu, les condiciones incorporaes nesti proyectu estratéxicu constitúin un aliciente pa que los estelleros asturianos puedan afondar en delles actuaciones yá empecipiaes: la tresformación dixital, la innovación na cadena de valor y la sostenibilidá. “Nesta última llinia, amás d'economía circular, eficiencia enerxética y meyora medioambiental, yá incorporaron l'hidróxenu como vector enerxéticu pa los barcos construyíos, como exemplu del so calter innovador”, precisó Aguilera.
 
Los mecanismos de respaldu que va facilitar el PERTE, bien al traviés d'ayudes directes o con préstamos, súmase a otros apoyos ufiertaos por alministraciones como'l Principáu, que tamién va apurrir fondos pa facer posible l'accesu a llinies d'avales y ferramientes que faciliten l'actividá. “Nesti contestu, ábrense importantes oportunidaes de xeneración d'empléu de calidá”, añadió'l director xeneral.