• Les especialidaes d’Infantil y Primaria acaparen les solicitúes, con más de 3.500 aspirantes na convocatoria
• El procedimientu de les pruebes prevé la composición d’unos 90 tribunales, que van evaluar a 70 opositores de media

La Conseyería d'Educación fixo públicu'l llistáu d'almitíos y escluyíos pa les oposiciones al cuerpu de maestros, que se van desenvolver a partir de xunu. De les 6.511 solicitúes presentaes, 6.459 fueron almitíes y les 52 restantes, escluyíes del procedimientu. La información recuéyese güei nel Boletín Oficial del Principáu (Bopa) y na web d’Educastur. 

El procedimientu selectivu cunta con dos víes: el turnu llibre y les places reservaes pa docentes con discapacidá reconocida. De les 6.391 solicitúes presentaes al turnu llibre fueron almitíes 6.347 y de les 120 pidimientos pal colectivu de discapacidá fueron aceptaes 112. 

Por especialidaes, dempués d'Infantil y Primaria, que sumen 3.517 pidimientos, les más solicitaes son Inglés y Pedagoxía Terapéutica. 

Los detalles de les solicitúes son los siguientes: 

Per otru llau, la Dirección Xeneral de Personal Docente sigue peracabando'l procedimientu de les oposiciones. Los tribunales tán anguaño en formación. La previsión actual ye que se conformen alredor de 90, con una media de 70 opositores per tribunal. De forma paralela tamién se ta actualizando'l protocolu de midíes preventives frente al coronavirus, que va regular la organización xeneral de les pruebes.
 
La Conseyería d'Educación yá decidió les localidaes onde se van celebrar les pruebes y les distintes sedes, que se correspuenden col siguiente llistáu:

• Educación Infantil: nel campus de Xixón de la Universidá d’Uviéu, la parte escrita de la primer prueba, y pa les llectures de la primer y la segunda prueba, el IES Jerónimo González, el CP Gervasio Ramos y el CP José Bernardo, los tres de Llangréu.
• Llingua estranxera-inglés, nel IES Aramo y el IES Doctor Fleming, n’Uviéu
• Educación física, nel CIFP Sectores Industrial y de Servicios, en Xixón.
• Música, nel IES Universidá Llaboral de Xixón pa la parte escrita de la primer prueba, y pa les llectures de la primer y la segunda prueba, el Conservatoriu Profesional de Música de Xixón.
•  Pedagoxía terapéutica, nos institutos avilesinos IES Virgen de La Luz e IES Carreño Miranda, la parte escrita de la primer prueba. Pa les llectures de la primer y segunda prueba, l’IES Virgen de La Luz.
• Audición y llinguaxe, nel IES Bernaldo de Quirós, de Mieres del Camín.
• Educación Primaria, nel aulariu del campus del Cristo A, d’Uviéu, pa la parte escrita de la primer prueba, y nel CP La Corredoria y el CP Poeta Ángel González pa les llectures de la primer y la segunda prueba.