Categories Navigation

Categories Navigation

El Principáu va realizar un nuevu estudiu topográficu del fondu marín en El Puerto pa definir el dragáu del muelle

17/03/2022
  • Estos trabayos, sumaos a los analises que va efectuar un robot submarín, van permitir conocer el volume de sedimentu acumulao na bocana y la so composición

La Conseyería de Mediu Rural y Cohesión Territorial va realizar nos próximos díes una batimetría o estudiu topográficu del fondu marín na bocana d'entrada al muelle d’El Puerto, en Navia. Col resultáu qu’apurran estos trabayos, sumáu a otros estudios, el Principáu va poder definir una solución técnica pa dragar el puertu.

La directora xeneral d'Infraestructures Viarias y Portuaries, Esther Díaz, y el director xeneral de Pesca Marítima, Francisco González, esplicaron güei esta midida nuna visita a la Confrería de Pescadores Nuestra Señora de la Atalaya. Los trabayos yá empezaron cola llegada d'un robot submarín teledirixíu, que los sos analís, sumaos a los resultaos qu’apurra la batimetría, van permitir conocer cuánto volume de sedimentu s’atropa na bocana y de qué material ta compuestu. Nel casu de que se trate d’arena, l'usu d'una draga de succión podría solucionar el problema, anque los analises preliminares paecen indicar que'l material tien mayor granulación y ta compuestu principalmente por piedra y grava, polo que pa retiralo sería mester emplegar otru tipu de maquinaria dende tierra.

El Gobiernu d'Asturies impulsa estes actuaciones nel marcu d'un proyectu xeneral pa favorecer el caltenimientu y conservación de los puertos de titularidá rexonal. Nel casu de Puertu de Vega, búscase ameyorar la maniobrabilidá y aumentar la seguridá d'embarcaciones y tripulantes nos accesos al muelle, dexando amás la entrada de barcos de mayor caláu.

Midíes pal sector pesqueru

El sector pesqueru podría beneficiase de les midíes que contempla'l Fondu Européu de Mar y Pesca (FEMP), dirixíes a compensar les medres que sufren los pescadores nos sos costos de producción. La Conseyería de Mediu Rural y Cohesión Territorial tamién plantega que s'establezan mecanismos de regulación y control de precios qu'atiendan a los costos de producción y que permiten al sector siguir afaenando y abasteciendo les rules.

Per otru llau, el director xeneral de Pesca Marítima, Francisco González, manifestó la so esmolición poles consecuencies de les movilizaciones del sector del tresporte, que tán paralizando l'actividá pesquera y, por tanto, afecten a la cadena alimentaria. González realizó un llamamientu a la responsabilidá y pidió que, dende'l respetu a un derechu lexítimu como ye la güelga, se garantice que los pescadores puedan desenvolver con normalidá la so actividá, máxime cuando n'apenes unos díes van empezar n'Asturies dos importantes costeres: la del bocarte y la de la xarda.  ​​​​​​​


 Declaraciones (mp3: 1,00 Mb)