• El conseyeru Enrique Fernández y el so equipu van caltener un alcuentru'l llunes coles principales compañíes de la rexón.
• Va abordar les midíes que se tán adoptando pol Principáu, el Gobiernu d'España y la Unión Europea.

La Conseyería d'Industria, Empléu y Promoción Económica convocó a una ventena d'empreses industriales con centros productivos ya instalaciones nel Principáu a una xunta p’analizar en conxuntu’l contestu actual y les midíes que se tán adoptando per parte del Gobiernu d'Asturies, el Gobiernu d'España y la Unión Europea.
Esta xunta, prevista pal llunes a les 17:30 hores, da continuidá a los contactos y conversaciones calteníes nes últimes selmanes pol conseyeru Enrique Fernández y los responsables de les direcciones xenerales d'Industria, Empléu y Formación y Enerxía, Minería y Reactivación coles principales empreses industriales y enerxétiques d'Asturies.

El gobiernu cursó invitaciones a les empreses qu'anunciaron midíes organizativas o que contactaron cola Conseyería d'Industria nos últimos díes: ArcelorMittal, AZSA, Moreda Rivière, Orovalle, Asturquimia, Saint Gobain, CAPSA, Danone, Toscaf, Alimerka, EDP, Grupu Masaveu, Hunosa, El Gaiteru y Hiasa-Gonvarri.

Enrique Fernández destaca que con esti alcuentru quier tener un contactu directu coles empreses más afectaes, facer un diagnósticu de la situación y analizar les perspectives del sector industrial.

“El Gobiernu d'Asturies ye consciente de la estrema gravedá de la situación actual pola conxunción de distintos factores como la medra de los precios de la enerxía, les consecuencies de la invasión d'Ucrania y la fuelga del tresporte de mercancíes, que tán xenerando paraes productives nes empreses”, afirmó Fernández.

“Les distintes Alministraciones tamos promoviendo polítiques de sofitu a los sectores y queremos aseguranos de que seyan abondo relevantes pa superar les actuales dificultaes y volver a entamar la sienda de fuerte recuperación post pandemia que tábemos teniendo na industria con cifres históriques d'esportaciones, actividá productiva empléu”, añadió.

Énte esta situación, y a la espera de les decisiones qu'adopte'l Conseyu Européu y les midíes que va anunciar el Gobiernu d'España'l martes, yá se tán produciendo delles meyores como'l marcu temporal de crisis anunciáu pola UE hasta finales d'añu, qu'inclúi ayudes directes a les empreses, llinies de creitu y compensaciones pola medra nel costu de la eletricidá.

Otra de les meyores ye l'alcuerdu pol cual Estaos Xuníos va incrementar les esportaciones de gas natural llicuao a la Unión Europea de cara a amenorgar la dependencia de Rusia.

Otramiente, Enrique Fernández confía en que l'alcuerdu suscritu esta madrugada pol Gobiernu d'España col Comité Nacional del Tresporte, xunto cola xunta prevista pola ministra cola Plataforma Nacional pola Defensa del Tresporte, dexen poner fin a los paros y recuperar el suministru de productos básicos y materies primes pa les empreses.

El conseyeru recuerda que'l Gobiernu d'Asturies yá adoptó un primer paquete de midíes pa sofitar a los sectores más afectaos pola fuelga del tresporte y pola medra de los precios de la enerxía y de los carburantes.