• Esta partida va dexar adquirir ordenadores portátiles pal personal, aumentar la dotación de les oficines municipales ya incorporar nueves ferramientes de xestión
•  La conseyera Rita Camblor considera qu'estos fondos ufierten “una oportunidá única” pa emprestar esti serviciu públicu esencial de manera más eficiente y con mayor calidá

El Principáu va recibir 5.591.202 euros del Ministeriu de Xusticia pa completar la renovación tecnolóxica de les sedes xudiciales y los xulgaos de paz y poner en marcha programes de xestión qu'ameyoren la relación cola ciudadanía. Los fondos proceden del Plan de Xusticia 2030, qu'impulsa'l Gobiernu d'España en cogobernanza coles comunidaes autónomes, coles mires de rematar la modernización y tresformamientu dixital d'esti serviciu públicu esencial.

La repartida de los fondos europeos foi'l principal asuntu abordáu na Conferencia Sectorial de Xusticia celebrada güei n'Avilés y presidida pola ministra del ramu, Pilar Llop. Na xunta, participaron la conseyera de Presidencia, Rita Camblor; la viceconseyera de Xusticia, Encarnación Vicente; y el director xeneral de Seguridá y Estratexa Dixital, Javier Fernández.

El Principáu tien previstu asignar los fondos que va recibir a los siguientes cuatro proyectos:

• Completar la renovación de los equipos de trabayu del personal de l'Alministración de Xusticia, por aciu la compra d'unos 1.400 ordenadores portátiles.
• Desenvolver software de soporte telemáticu que dexe al personal acompañar a los usuarios, emponiéndolos pasu a pasu nos trámites, y fortalecer, otramiente, la capacitación dixital de los emplegaos con programes específicos d'aprendizaxe, entrenamientu y desenvolvimientu d'habilidaes dixitales.
• Ameyorar l'equipamientu tecnolóxicu de les oficines municipales de xusticia (los actuales xulgaos de paz).
• Cuntar con un software de xestión de relaciones con ciudadanía y profesionales que va dexar interactuar de forma multicanal.

A xuiciu de la conseyera de Presidencia, los fondos que va recibir el Principáu ufierten una oportunidá única pa emprestar esti serviciu públicu esencial de manera más eficiente y con mayor calidá. “Enfrentamos al retu de tresformar la xusticia nun serviciu entornáu na ciudadanía y nos profesionales, qu'ameyore y modernice el so funcionamientu y vamos poner tou'l nuesu enfotu en consiguilo”, aseguró Camblor.

Ente otros asuntos, na conferencia sectorial tamién s'aprobó'l marcu común sobrr igualdá de tratu y non discriminación ente homes y muyeres na Alministración de Xusticia, tien l’oxetivu de garantizar el derechu de les persones a nun sufrir discriminación per razón de sexu. Coles mesmes, alcordóse la puesta en marcha d'acciones positives p'avanzar dende la igualdá formal reconocida nel ordenamientu xurídicu escontra la igualdá real.

Rita Camblor esplicó qu'estes iniciatives atópense yá nuna fase avanzada n'Asturies, cuidao que el Principáu cunta con un diagnósticu sobre la situación de muyeres y homes na Alministración autonómica, nel que s'incluyó al personal de Xusticia tresferíu a la comunidá.