• El Conseyu de Gobiernu aprobó la concesión demanial de la residencia y el campu de regates por 10 años
• Cultura considera que l'alministración profesional va permitir maximizar el rendimientu deportivu del complexu de Corvera

El Gobiernu d'Asturies dio lluz verde a la cesión de les instalaciones del Centru de Tecnificación Deportiva de Trasona/Tresona a la Federación de Piragüismu del Principáu (FPPA) para la so xestión por 10 años. L'alcuerdu, aprobáu esta selmana, establez les condiciones xenerales qu'han de rexir la concesión demanial gratuita en favor de la entidá pa qu'esplote l'edificiu de la residencia y el campu de regatas del complexu deportivu de Corvera.

La Conseyería de Cultura, Política Llingüística y Turismu considera que la xestión profesional que va llevar a cabu la federación va dexar maximizar el rendimientu de les instalaciones al traviés del desenvolvimientu de planes de tecnificación a tolos niveles, cuidao que l'organismu cunta colos medios, intendencia, capacidá d'organización y conocimientos  necesarios pa garantizar que, dende la base hasta l'altu rendimientu, exista un contestu aparente pal crecimientu y evolución del colectivu de deportistes.

L'alcuerdu de cesión de les instalaciones de Tresona a la Federación de Piragüismu pretende impulsar la proyección y rendimientu d'un complexu que ye un referente nacional pa esta disciplina. L’enraizamientu y el prestíu del piragüismu n'Asturies son innegables, non yá gracies a cites tan relevantes como'l Descensu Internacional del Sella, sinón tamién a la práctica estendida a ríos como'l Cares y el Deva, a banzaos, ríes y la mariña asturiana. A esa vertiente deportiva súmase tamién el componente de reclamu turísticu como actividá acuática al aire llibre.​​​