​​​​​​​ 
 

• Esta técnica mínimamente invasiva evita realizar incisiones p’ aportar a la cavidá abdominal y facilita una recuperación más rápida y ensin repulgos visibles

L'Hospital Valle del Nalón (HVN), de Riañu (Llangréu), ye'l segundu centru sanitariu de la comunidá, tres l'Hospital Universitariu Central d'Asturies (HUCA), qu'implanta la ciruxía vaxinal  de puertu únicu, una intervención mínimamente invasiva que nun precisa incisiones para aportar a la cavidá abdominal y por eso nun dexa repulgos visibles.

Esta técnica denominada vNOTES (Natural orifice transluminal endoscopic surgery) ameyora la recuperación de les muyeres que se someten a una intervención xinecolóxica al menguar el dolor postoperatoriu y los posibles entueyos venceyaos a la ciruxía abdominal convencionalTrátase d'una alternativa quirúrxica segura, qu'amenorga la necesidá de cuidaos y l'estancia hospitalaria.

La intervención consiste n'aportar a la cavidá abdominal al traviés de la matriz. Pa ello, asítiase un dispositivu especial que dexa introducir el instrumentu necesariu ensin necesidá d'usar trocares, lo qu'evita que queden repulgos nel banduyu. La técnica puede utilizase na mayoría de les patoloxíes xinecolóxiques benignes y en delles malines, y ta especialmente indicada en muyeres con riesgu d'entueyos na ciruxía convencional, como les que presenten sobrepesu. 

El Serviciu de Xinecoloxía del HVN realizó esta selmana per primer vez esta intervención a una paciente con un prolapso úteru-vaxinal y un duviesu ováricu de 6 centímetros. El xefe del serviciu, el xinecólogu Alejandro González, asistíu poles xinecólogues María Población y Beatriz Duplá, practicó una histerectomía total a una paciente con doble anexectomía, esto ye, extirpó l'úteru, les trompes y los ovarios. La operación, que resultó un éxtu, enllargose  dos hores y la muyer recibió l'alta a otru día.

N'Asturies, les xinecólogues Beatriz Duplá y Soledá Fidalgo usaron esta técnica per primer veza n'ochobre nel HUCA, ún de los primeros hospitales públicos del país en disponer d'esta alternativa quirúrxica, que tamién s'emplegará d'equí p'arriba nel Hospital Valle del Nalón.​​