​​​​​​​​​​​​​​

• Dende güei y hasta’l 3 d'abril van tener llugar talleres y esposiciones en Xixón, Avilés, Uviéu, Bimenes, Colunga, Grau, Grandas, Lluanco, Mieres del Camín, Porrúa, Quirós y Somiedu
• El Gobiernu d'Asturies destina 175.000 euros p’ayudes a un sector que cunta con más de 200 profesionales

Asturies va conmemorar los Díes Europeos de l'Artesanía cola celebración de 36 actividaes culturales y de promoción del sector en doce conceyos. Entamaos pol Mercáu Artesanu y Ecolóxicu de Xixón y patrocinaos pola Conseyería d'Industria, Empléu y Promoción Económica, el Principáu ye la comunidá autónoma que más actos entamó pa esta conmemoración.

Los Díes Europeos de l'Artesanía, que n'Asturies se celebren col lema Esencia Artesana, fueron presentaos esta mañana nel Muséu del Pueblu d'Asturies por Julio González Zapico, director xeneral de Comerciu, Entamamientu y Economía Social, nun actu nel que participaron Javier Ruiz, presidente del Mercáu Artesanu y Ecolóxicu, y Laura de Miguel, directora de Fundearte.

Nesta edición, que se celebra dende güei hasta'l 3 d'abril, ta prevista la celebración d'esposiciones, talleres y cursos en doce localidaes cola mira d'averar la fiesta europea de l'artesanía al mediu rural: Xixón; Avilés; Uviéu; Bimenes; Colunga; Grau; Grandas; Lluanco; Mieres del Camín; Porrúa; Quirós y Somiedu.

Esencia Artesana ye un eventu de calter festivu y divulgativu col que pretende promovese y averar l'artesanía asturiana al conxuntu de la ciudadanía. Toles actividaes son gratuites.

La programación incluye talleres participativos de cerámica, cueru, telar, tornería, fieltru, cestería o títeres. Tamién se van realizar demostraciones en vivo de dalgunos de distintos oficios y esposiciones d'artesanía ente les que se destaquen la prevista nel Muséu Marítimu d'Asturies, en Lluanco, que va allugar una muestra de los premios de Pieza Única qu'añalmente concede la Conseyería d'Industria a les meyores creaciones artesanes nel Principáu.

Los Díes Europeos de l'Artesanía ye una iniciativa promovida n'España pola Escuela d'Organización Industrial (EOI), fundación pública y primer escuela de negocios d'España, la so área de promoción de l'artesanía Fundesarte, y Oficiu y Arte, Organización de los Artesanos d'España.

El sofitu de la Conseyería d'Industria, Empléu y Promoción Comercial a la celebración de los díes europeos enmárcase dientro de les polítiques públiques de promoción del sector artesanu, que n'Asturies ta formáu por 227 profesionales rexistraos de 84 oficios.

Esti sofitu concrétase en tres llinies de sofitu, con un presupuestu p'anguaño de 175.000 euros:

• 100.000 euros pa la organización de feries y cursos de formación  coles mires d'ameyorar la comercialización de les producciones y implicar al sector na celebración d'eventos sectoriales. L'añu pasáu concediéronse nel 2021 ayudes pa la celebración de 8 feries d'artesanía por un importe total de 74.379,53 euros.
• 40.000 euros pa inversiones en talleres coles mires de sofitar la renovación d'equipos y la meyora de los procesos productivos. Nel añu 2021 concedióse subvención a 14 talleres por un importe total de 15.221 euros.
• 35.000 euros pa l'asistencia de profesionales a feries y cursos fuera del Principáu, de cara a sofitar l'actualización de conocimientos ente los profesionales, l'accesu a mercaos nuevos y la meyora de la imaxe esterior del conxuntu de l'artesanía rexonal. Anguaño beneficiáronse d'estes ayudes un total de 34 proyectos por un total de 18.905 euros.

​​​​​​​

Cartelu del eventu (png: 2013 Kb)
Programa DEA (pdf: 631 Kb)​​​​​​​