• El Ministeriu de Facienda considera la obra del institutu como un exemplu d’aplicación de los fondos Feder

El Gobiernu d'España, al traviés del Ministeriu de Facienda y Función Pública, distinguió'l proyectu del nuevu Institutu d'Enseñanza Secundaria (IES) de La Fresneda como exemplu de “bones práctiques” n'actuaciones cofinanciaes pola Unión Europea (UE).

El proyectu del equipamientu, promovidíu y executáu pola Conseyería d'Educación, tuvo un presupuestu de 5,48 millones y foi cofinanciáu pola UE al traviés del Fondu Européu de Desenvolvimientu Rexonal (Feder). El diseñu de la obra ta firmáu polos arquitectos Raúl Gil y Luis García, de Código Arquitectura. La conseyería recepcionó l'equipamientu educativu'l 22 de xunetu ya inauguróse en septiembre con 111 estudiantes de 1º  d'ESO y 1º de Bachilleratu, y 29 docentes.

El Ministeriu de Facienda destacó dellos aspectos pa considerar el proyectu como bona práctica 2021:  

• L'espardimientu ente los beneficiarios y el públicu. La información y la comunicación fueron un elementu fundamental nel procesu de construcción del edificiu y na concienciación ciudadana acerca del valor de la cofinanciación europea. Destácase particularmente la información apurrida dende les páxines web del Gobiernu d'Asturies y Educastur sobre la evolución de les obres y la inauguración, amás de la so repercusión al traviés de los medios de comunicación.
• Elementos innovadores. El proyectu apurre novedaes relevantes, como'l diseñu d'aules ensin parés fixes que dexen adaptales a diverses necesidaes o tar edificáu so premises de sostenibilidá (protecciones solares, fachada ventilada, carpintería con vidrios triples, llume LED o sensores de temperatura).
• Adecuación de resultancies y oxetivos. La inversión realizada pol Principáu nel equipamientu fomenta la equidá nel accesu a la enseñanza y la calidá de la educación, al estender y ameyorar la rede de centros. Destácase tamién la cercanía del equipamientu al área residencial del alumnáu.
• Criterios d'igualdá y de sostenibilidá. La distinción tamién tuvo en cuenta que l'edificiu ye accesible y adaptáu, lo que permite a les persones con movilidá y comunicación amenorgada aportar y circular ensin torgues. D’otra miente, destácase que se buscara la integración na redolada, s’aplicaren criterios de sostenibilidá ambiental y alliniaren l'actuación cola estratexa europea d'adaptación al cambéu climáticu.

L'edificiu foi concebíu dende’l Proyecto Espacios, ellaboráu por un grupu de trabayu de la Conseyería d'Educación, nel que se recoyíen idees pa desenvolver nuevos espacios d'aprendizaxe nel Principáu.​​​