• El programa internacional va evaluar a alumnáu nacío nel 2006 a partir de la selmana próxima.

Les pruebes pa la ellaboración del informe del Programa Internacional d'Evaluación del Alumnáu (PISA), que'l so calendariu d'aplicación empieza güei, van facese n'Asturies a partir de la selmana próxima. Un total de 1.900 estudiantes de 53 centros educativos van tomar parte nesta edición, na que se convocó a alumnáu nacío nel 2006.

Los técnicos de la Conseyería d'Educación van reunise mañana colos centros implicaos y cola empresa de l'aplicación de les pruebes p’afitar el trabayu de campu y definir los detalles de la convocatoria.

L'alumnáu participante va tener qu'enfrentase a un test de conocencies, procedimientos y actitúes que se va desenvolver en formatu dixital offline. El programa PISA evalúa de manera regular los resultaos educativos del alumnáu de 15 años en Llectura, Matemátiques y Ciencies. La prueba, na que participen 70 países, ta considerada la evaluación comparativa de los sistemes educativos más ambiciosa a nivel internacional.

España participa nesta iniciativa desque empezó, nel añu 2000, y Asturies participa con muestra representativa de los sos centros dende’l 2006. La relevancia de la información que facilita l'informe PISA fai que nesta edición toles alministraciones españoles participen con muestra ampliada.

Asturies asitióse tradicionalmente en resultaos percima de la media d'España y en términos paecíos a la Unión Europea (UE) y la Organización pa la Cooperación y el Desenvolvimientu Económicu (OCDE)

Cola incorporación a International Computer and Information Literacy Study (ICILS) nel 2023, anunciada va unos meses, la Conseyería d'Educación amplía la so llinia d'investigación nel contestu internacional. Asina, Asturies participa yá con muestres ampliaes en PISA, TIMSS y PIRLS, que miden les competencies en Primaria.