​​​​​​​​​​​​​​

• L’órganu analiza los avances nel programa de restauración ambiental del estuariu, dotáu con 1,5 millones del Mecanismu de Recuperación y Resiliencia.
• La sienda que va xuntar la capital del conceyu con El Puntal busca favorecer una movilidá sostenible na oriella esquierda.

El Gobiernu d’Asturies presentó güei al Foru de Participación Social de la Reserva Natural de Villaviciosa les actuaciones pa la meyora integral de la ría, nes que tán implicaes delles alministraciones, y que se centren nel caltenimientu de la rodiada.

Asina, na xunta treslladáronse les meyores na definición del programa de restauración ecolóxica de zones húmedes pa la so adaptación al cambéu climáticu. Esta iniciativa, promovida pola Conseyería de Mediu Rural y Cohesión Territorial y financiada con fondos Next Generation del programa de Recuperación, Tresformación y Resiliencia, ta dotada con 1,5 millones.

El director xeneral del Mediu Natural y Participación Rural, David Villar, esplicó que, desque realizáu un análisis ambiental exhaustivu, ellaboróse un proyectu con actuaciones por sectores. D’esta manera, van consolidase los porreos pal so aprovechamientu agrolóxicu sostenible, la naturalización de zones añagables, la retirada d’elementos antrópicos y residuos, amás de la restauración d’espacios degradaos pal caltenimientu de flora y fauna.

Nel alcuentru tamién s’informó sobre les alternatives pa favorecer una movilidá sostenible, tanto pa peatones como pa bicicletes, na oriella esquierda de la ría. Concretamente, esplicóse la propuesta pa la execución d’una sienda que va xuntar El Puntal cola capital del conceyu aprovechando la rede actual de caminos. La ruta, que va conectar la gran mayoría de les viviendes espardíes pela zona, combina dellos tramos de viales yá existentes con otros que van dir paralelos al estuariu, amás de les conexones ente dambos. Amás, van construyise accesos a dellos miradores panorámicos que se van poner a lo llargo del percorríu, onde se van instalar paneles informativos sobre’l valor ambiental de la redolada.

Otra manera, tratáronse les actuaciones realizaes al respective de l’actividá tradicional del marisquéu y repasóse la información sobre la calidá del agua y la xestión y protección de la reserva, que tien valores medioambientales importantes y ta integrada na rede de zones húmedes del Conveniu Ramsar.

Amás del director xeneral del Mediu Natural y Planificación Rural, na xunta participaron tamién los directores xenerales de Pesca Marítima, Francisco González, y de Calidá Ambiental y Cambéu Climáticu, Pablo Álvarez, y la directora xeneral d’Ordenación del Territoriu y Urbanismu, Sonia Puente Landázuri.

Audio del director general del Medio Natural y Planificación Rural, David Villar (mp3 773 Kb)