El Gobiernu d’Asturies apoya les midíes aprobaes pol Conseyu de Ministros, que van ayudar a impulsar l’actividá económica y defender a la población más vulnerable
- El Principáu sofita l’alcuerdu algamáu por Pedro Sánchez na UE, que va dexar aplicar midíes escepcionales nel nuestru país y Portugal pa poner topes al preciu del gas y frenar l’encarecimientu de la enerxía
- El plan de choque España respuende recueye bona parte de les iniciatives propuestes por Asturies, como la intervención sobre los carburantes, el refuerzu del bonu social o l’adopción de decisiones que beneficien a la industria y al sector primariu
- L’Executivu autonómicu, que llama a la responsabilidá de los tresportistes qu’enta siguen col paru, caltién les sos propuestes pa que les compensaciones por CO2 algamen el máximu llegal posible
- El gabinete d’Adrián Barbón fai un llamáu a les fuercies parllamentaries pa que respuendan al altor de les circunstancies y faciliten la convalidación del decretu llei, necesariu pa encarar la situación escepcional que vivimos
El Gobiernu d’Asturies sofita’l despliegue de midíes aprobaes ayeri pol Conseyu de Ministros pa facer frente a los daños económicos y sociales de la guerra de Putin. El Principáu considera tamién perpositivu l’alcuerdu alcanzáu pol presidente Pedro Sánchez nel Conseyu de la Unión Europea pa qu’España y Portugal puedan aplicar midíes escepcionales que pongan tope al preciu del gas, causa principal del encarecimientu de la enerxía y de la consecuente medría de la inflación.
El Principáu celebró’l miércoles pasáu una xunta estraordinaria del Conseyu de Gobiernu pa remediar los efectos de la espiral inflacionista. Entós adoptó midíes de sofitu al sector primariu, alcordó complementar nun 50 % el bonu social térmicu y anunció un proyectu de llei que faiga posible la revisión temporal de delles de les tases vinculaes a los sectores más castigaos, como’l tresporte, la pesca, la ganadería o l’agricultura. Dalgunes d’eses iniciatives yá tán en vigor. Por exemplu, dende güei ta abiertu’l plazu de solicitú d’ayudes correspondientes a la Política Agraria Común (PAC), qu’esti exerciciu sumen 96 millones. Esta cantidá va valir de garantía financiera pa que los bancos puedan adelantar el 90 % de los pagos a llabradores y ganaderos.
Na mesma xunta, el Principáu presentó propuestes y decisiones d’algame nacional. Asina, sofitó les xestiones europees de Pedro Sánchez, que remataron na reconocencia de la escepcionalidá enerxética de la Península Ibérica. A falta de concreción, esti entendimientu va dexar qu’España y Portugal impongan un tope superior al preciu del gas, lo que va minorar sensiblemente’l preciu resultante del mercáu eléctricu y ensin afección sobre los consumidores privaos nin industriales. L’abaratamientu d’estos costos ye de la máxima relevancia pa la industria y, sobre manera, pa les compañíes que precisen muncha enerxía.
Otra miente, el Gobiernu d’Asturies defendió la intervención inmediata sobre los precios del carburante. El real decretu llei alcordáu pol Conseyu de Ministros incluye una rebaxa de 0,20 euros por llitru de combustible recargao, que va entrar en vigor a partir del vienres. Esta foi xunto a la concesión d’ayudes directes al sector una de les decisiones que contribuyeron al alcuerdu coles principales organizaciones del tresporte. L’Executivu del Principáu llama a la sensatez y responsabilidá de quien entá caltienen los paros, de manera que dexen la recuperación de la normalidá empresarial n’Asturies, afectada por problemes de suministru y distribución.
La disposición de 10.000 millones en creitos ICO tamién va na llinia de les propuestes del Principáu, que defendía una prórroga nel plazu de los empréstamos. Por poner otru casu, l’Executivu autonómicu defendió la posibilidá de volver recurrir a los espedientes de regulación temporal d’empléu en condiciones asemeyaes a les que rixeron cuando la pandemia. Esta opción tamién la asumió’l Gobiernu d’España.
244 millones por CO2 pa les electrointensives
Los sofitos a la industria y, de manera particular, a la gran consumidora d’enerxía conformen otru gran bloque del plan de choque del Gobiernu central. Ente les iniciatives aprobaes, inclúyese la rebaxa d’un 80 % de los peaxes d’accesu a les redes de tresporte y distribución. Esta midida, que va beneficiar a unos 600 consumidores electrointensivos, ta cuantificada en 225 millones y foi propuesta de contino pol Principáu.
La llista d’ayudes supón un aumentu de 65 millones nes compensaciones por emisiones de CO2, una de les solicitúes más repetíes pol Gobiernu d’Asturies. Con esta medría, el total previstu pa 2022 va xubir a 244 millones, una cantidá bien superior a los 6 millones presupuestaos nos últimos años de mandatu de Mariano Rajoy.
El Principáu considera qu’esti aumentu, xuníu a les demás midíes de respaldu a la industria y, sobre manera, l’abaratamientu de los precios de la enerxía–, va repercutir favorablemente sobre’l sector. Sicasí, sigue defendiendo qu’estes ayudes algamen el máximu llegal previstu, equivalente al 25 % de los ingresos llograos nes correspondientes puyes de derechos d’emisión de dióxidu de carbonu.
Nel mesmu orde de coses anque entiende que son demandes más específiques que nun proceden nun plan de choque, el Gobiernu d’Asturies promueve la puesta en marcha de la regasificadora d’El Musel y la definición y afitamientu del futuru d’Hunosa.
El gabinete d’Adrián Barbón considera qu’esti contestu escepcional rique tanto la máxima unidá política y social como l’aplicación de midíes urxentes pa torgar que la coxuntura s’agrave. Polo tanto, solicita a toles fuercies parllamentaries qu’actúen al altor de les circunstancies, tean predispuestes al diálogu y sofiten la convalidación del decreto llei, de manera qu’algame la mayor efectividá posible.
