• Cristina Fanjul ye una de les 35 persones escoyíes pol altu comisionáu pa España Nación Entamadora

La directora del Centru Européu d'Empreses y Innovación (CEEI), Cristina Fanjul, entró a formar parte del Conseyu Asesor pa España Nación Entamadora, un órganu que pretende asitiar al país como unu de los meyores pal entamamientu innovador. L'órganu, integráu por 35 profesionales, ta acabante de constituyise en Madrid baxo la presidencia del altu comisionáu, Francisco Polo.

Los miembros d'esti grupu asesor son especialistes en distintes disciplines y ámbitos rellacionaos col entamamientu y la innovación y cunten con conocencies alliniaes coles metes y los sectores tractores que guíen la Estratexa España Nación Entamadora.

Amás de directora del CEEI, Cristina Fanjul ye presidenta de la rede europea d'entidaes d'innovación empresarial y entamamientu (European Business Network) y esperta evaluadora de la iniciativa de sofitu a empreses emerxentes (startups) EIC Accelerator. Tamién forma parte del comité asesor del programa Marie Curie y participa en bien de proyectos del ecosistema entamador y innovador européu.

Cristina Fanjul manifestó’l so contentu de participar nesti órganu “con persones con bagaxes y competencies bien diverses, xuníes pola ilusión d'aportar a esta misión de país”.

Ente les funciones principales del conseyu destaquen: l'asesoramientu al altu comisionáu nel desenvolvimientu y execución de la Estratexa España Nación Entamadora, la xeneración de documentos sobre la implantación d'esta estratexa y la situación del entamamientu innovador nel territoriu nacional, la misión de facer d'España una nación entamadora y impulsar el diálogu ente los axentes sociales y económicos.