• El plan apuesta pol caltenimientu y destina más de 10 millones al añu mientres 5 exercicios p’actuaciones en más de 500 quilómetros de 30 carreteres de la rede autonómica
• El Principáu destaca les obres previstes na AS-15, l'AS-14 y nel conxuntu de víes de la exa La Espina- Zarréu
• El conseyeru Alejandro Calvo solicita comparecer na Xunta Xeneral pa informar de tolos detalles d'esti proyectu

El conseyeru de Mediu Rural y Cohesión Territorial, Alejandro Calvo, presentó esta tarde a los alcaldes de los cinco conceyos del suroccidente (Ayande, Cangas, Degaña, Ibias y Tinéu) una meyora del programa d'inversiones plurianuales n'infraestructures pa la zona, que se va desenvolver mientres los cinco exercicios próximos. El proyectu va destinar más de 10 millones al añu pal caltenimientu de la rede de carreteres de la comarca y incluye obres de meyora en 30 viales d'ámbitu rexonal, comarcal y local, que van suponer la renovación de más de 500 quilómetros de víes.

Los alcaldes d'Ayande, José Antonio Mesa; Cangas, José Víctor Rodríguez; Degaña, Óscar Ancares, y Tinéu, José Ramón Feito, y l'alcaldesa de Ibias, Gemma Álvarez, participaron nesti alcuentru al que tamién asistieron el viceconseyeru d'Infraestructures, Movilidá y Territoriu, Jorge García, y la directora xeneral d'Infraestructures Viaries y Portuaries, Esther Díaz.

El plan prioriza les inversiones a partir de la situación actual de les víes y los niveles de tráficu de les mesmes. D'esta miente, el Principáu va intervenir na AS-15, el corredor del Narcea, onde se va proceder a la meyora integral de tolos aspectos de caltenimientu preventivu, asina como a la realización d'obres nel tramu que xune'l túnel de Calabazos y Casares, en Tinéu, y el qu'enllaza Cangas y Rengos. Amás, tamién s'incorporen cuatro estudios nuevos de trazáu p’ameyorar esta carretera, que conecta Corniana col Puertu de Zarréu.

Otra de les víes que va recibir mayor inversión nos cinco años próximos ye l'AS-14, que xune Pontelinfiernu, en Cangas, con Grandas. En concreto, la Conseyería de Mediu Rural y Cohesión Territorial plantega actuaciones nos tramos La Puela-Puertu d'El Palu y Berducedo-Grandas.

Na xunta tamién s'esplicó l'oxetivu de reforciar la exa Ponferrada-La Espina, con actuaciones en toles víes que configuren esti trayectu interprovincial. Asina, el Principáu va actuar na meyora de les carreteres AS-215, AS-216 y AS-349, ente La Espina y l'enllaz col AS-15. Tamién se va intervenir sobre la recuperada carretera de Valdeprado, que conecta Zarréu col conceyu lleonés de Pandorial del Sil.

Alejandro Calvo solicitó comparecer na Xunta Xeneral del Principáu pa treslladar a la cámara los detalles d'esti programa, qu'establez un completu calendariu d'actuaciones y inversiones nel suroccidente mientres los cinco exercicios próximos, dende anguaño hasta’l 2027.