• El Principáu va aprobar a finales d'añu la estratexa nesta materia, que va tar vixente hasta 2030
• Juan Cofiño asitia a la ciudadanía como artífiz del cambéu productivu colos sos vezos de consumu y xestión de residuos

El vicepresidente y conseyeru d'Alministración Autonómica, Mediu Ambiente y Cambéu Climáticu, Juan Cofiño, afirmó güei que la economía circular, basada na máxima reutilización de los residuos, “va tener un papel protagonista nel nuevu modelu económicu d'Asturies, que va ser sostenible, hipocarbónicu, eficiente nel usu de recursos, dixital y competitivu”.

Na so intervención na apertura de la xornada sobre la futura Estratexa d'Economía Circular del Principáu, que'l so periodu de vixencia va llegar hasta 2030, Cofiño indicó que'l propósitu del Gobiernu d'Asturies consiste n’ “ampliar el tiempu d'usu de los materiales, productos y recursos, amenorgar la xeneración de residuos o, cuando esto nun seya posible, da-yos valor reintroduciéndolos nel ciclu productivu como materies primes secundaries”.

Según señaló'l conseyeru, la nueva economía de les residuos non solo ayuda a la sostenibilidá del planeta, sinón que garantiza una mayor disponibilidá de les materies primes necesaries pa la creación de productos y una menor dependencia d'otros países, mesmo que oportunidaes de negociu y xeneración d'empléu.

“Tamos siendo testigos de la nuestra vulnerabilidá y de cómo la escasez de materies primes se traduz nuna xuba de precios qu'impacta directamente na nuesa economía, polo que nos fortalez ser eficientes nel usu de recursos y cuanta mayor autonomía tengamos, meyor”, añadió Cofiño.

D’otra miente, destacó que la economía circular puede amenorgar hasta un 45% les emisiones contaminantes implicaes nos procesos de producción y de consumu, polo que constitúi una estratexa clave na mitigación del cambéu climáticu.

El vicepresidente tamién se refirió al Consorciu pa la Xestión de Residuos Sólidos d'Asturies (Coxersa) como “pieza clave na tresformación económica pola so esperiencia y saber facer en materia de reciclax y valorización de residuos”, lo que, al so xuiciu, “va permitir treslladar eses bones práctiques como opciones pa valorizar los subproductos y residuos de la industria y d'otros sectores como la construcción, l’agroalimentación, la minería o la xestión forestal”.

El documentu, que se va aprobar a finales d'añu, implica a tola sociedá, dende los distintos departamentos del Gobiernu d'Asturies hasta les empreses, la industria, los organismos d'investigación o les entidaes financieres. Nesti sentíu, el vicepresidente asitió a la ciudadanía como “la verdadera protagonista del cambéu, colos sos vezos de consumu y de xestión de residuos”. “Va ser la so elección de compra la que va dar verdaderu sentíu al cambéu de modelu productivu”, precisó.

Materiales reciclaos

Pela so parte, la viceconseyera de Mediu Ambiente, Nieves Roqueñí, esplicó qu'ún de los principales oxetivos de la estratexa ye “aforrar na estracción de materies primes por aciu la medra de la proporción de recursos provenientes de materiales reciclaos”. Amás, valoró “el marxe de meyora existente pa incrementar l'índiz de la circularidá nel Principáu”, que s'asitia na actualidá alredor al 7%”.

Roqueñí tamién anunció la creación d'un comité asesor de calter consultivu, formáu por una ventena de persones procedentes de l'Alministración, la industria y el sector empresarial, que va contribuyir a ellaborar y a realizar un siguimientu de la estratexa.

Nes xornaes presentóse un portal web venceyáu a la estratexa como ferramienta de comunicación, sensibilización y espardimientu, cola fin de treslladar el conceptu y oxetivos de la economía circular a la sociedá de la forma más clara posible.

Na presentación de la meyora de la estratexa tamién participaron, ente otros, el director xeneral de Calidá Ambiental y Cambéu Climáticu, Pablo Álvarez; los xerentes de Coxersa y Cadasa, Paz Orviz y Julio Pérez, respectivamente, y la directora del Idepa, Eva Pando.

​​​​​​​ Audios del vicepresidente y consejero de Administración Autonómica, Medio Ambiente y Cambio Climático, Juan Cofiño (mp3 1165 Kb)​​​​​​​