• La supresión de los exámenes de setiembre na ESO dexa axustar les feches
• La estructura mantién los periodos de descansu de cinco díes en metá de los trimestres

La Conseyería d'Educación aprobó güei el calendariu escolar pal cursu qu’entra (2022-2023), qu'unifica pela primer vez l'entamu y el final del cursu d'Infantil y Primaria col de Secundaria y Bachilleratu. La supresión de los exámenes de recuperación de setiembre na Educación Secundaria Obligatoria (ESO), tres de la entrada a valir de la LOMLOE, dexó afaer les feches, yá que los centros van tener más marxe organizativo.

Per otra parte, la estructura del calendariu escolar caltién los periodos de respiru en metá de los dos primeros trimestres, que son los más estensos. Les vacaciones de Navidá sumen 16 díes y les de Selmana Santa allárguense a 11 pa favorecer el descansu del alumnáu. Estes postreres repártense per delantre y per detrás de la ponte festiva.

La directora xeneral de Planificación y Infraestructures Educatives, María Elena Arango, presentó una propuesta que trata de conciliar los pidimientos presentaos por adelantao por representantes de les families, los sindicatos de la enseñanza pública y de la privada-concertada y les direcciones de los centros, al traviés de los comités.

“La organización que saquemos adelantre intenta averar les postures de tola comunidá educativa, con un equilibriu entre los trimestres y ufiertando una respuesta a les necesidaes metodolóxicu y pedagóxicu que rique l'alumnáu”, esplicó Arango.  

El calendariu caltien 177 díes lectivos, a los qu'hai que descontar los dos festivos de cada conceyu. 

El cursu n'Infantil, Primaria, Secundaria y Bachilleratu va empezar el 12 de setiembre y va concluyir el 23 de xunu. Caltiénense los dos principales periodos vacacionales: el primeru, del sábadu 24 d'avientu al domingu 8 de xineru, y el segundu, del sábadu 1 d'abril al martes 11 d'abril.   

Amás, introdúcense dos periodos de respiru de cinco díes cada unu y unu de cuatro en metá de los dos primeros trimestres. El primeru d'estes pontes ta previstu al mes y medio del entamu de les clases. Asina, afítense como non lectivos el 31 d'ochobre y el 2 de payares, que se xunen al 1 payares, festivu nacional, y a la fin de selmana. 

El de cuatro díes coincide cola ponte de la Constitución. Considérase non lectivu'l llunes, día 5 d'avientu, que s'encadena a la ponte y al día de la Constitución. Sicasí, sí va haber clase'l miércoles 7 y el vienres 9.

El segundu descansu de cinco díes va llegar en febreru. Asina, establécense como non lectivos los díes 17, 20 y 21, que se xunen nuevamente a una fin de selmana, coincidiendo con Antroxu.

Con esti calendariu, l'alumnáu va tener 68 díes de clase nel primer trimestre, 57 nel segundu y 52 nel terceru. 

Calendariu escolar 2022-2023 (pdf: 93 Kb)