• Los cocineros Marcos Morán y Xune Andrade, xunto colo reposteru Alejandro F. Tuero, ufierten demostraciones nel Salón Internacional Alimentaria

El Principáu participa na feria Alimentaria 2022, que se celebra esta selmana en Barcelona, coles mires de reforzar la so condición de destín gastronómicu de la mano de los sos embaxadores de Cocina de paisaxe. Los chefs Marcos Morán (Casa Gerardo) y Xune Andrade (Monte San Feliz) y el repostero Alejandro F. Tuero (Casa Gerardo) ufiertaron güei cinco demostraciones culinaries.

Marcos Morán y Alejandro F. Tuero centráronse nun brunch nel que combinaron platos dulces y salaos con productos representativos d'Asturies, ente ellos, el cóctel sólidu de mazana, el bocáu cruxente de quesos o’l picatoste de Casa Gerardo. Pela so parte, Xune Andrade ufiertó la so interpretación del vermú al traviés de trés ellaboraciones (buñuelu de callos y cilindru de steak tartar de xata roxa, maíz afumao y anisados monteses) xunto con maceraciones y arumosos. 

Pa la comida, Marcos Morán y Xune Andrade mostraron la so particular visión la Cocina de paisaxe. Asina, Andrade ellaboró dos platos bien significativos: salmón al caricote en guisu de pataques con costiella y albóndigues de vaca, zusmiu d’alines de pitu caleya y viña d'iviernu. Marcos Morán, pela so parte, cocinó dos platos tamién bien representativos de la so cocina: Phaseolus (fréxoles y fabes) y llubina nel so zusmiu.

Pa esta tarde, la merienda va correr  al cargu d'Alejandro F. Tuero, que va esponer la so versión de la tortiella de mazana y una tartaleta de freses de temporada y de testures d'ablana asturiana.

La viceconseyera de Turismu, Graciela Blanco, aprovechó la so visita a la feria pa destacar el “escepcional momentu que ta viviendo la gastronomía asturiana”. Coles mesmes, estimó'l llabor de los profesionales que consiguieron que la Cocina de paisaxe trunfara en Madrid Fusión y facer agora en Alimentaria 2022.

Plan d'allugamientu

La participación d'Asturies nesta feria constitúi xuna de les actividaes del plan d'allugamientu gastronómicu, que la Viceconsejería de Turismu punxo en marcha en 2021. La integración del paisaxe, los productos y el talentu culinario nuna mesma identidá ye la ventaya competitiva que defende'l lema Cocina de paisaxe, col qu'Asturies va participar na próxima edición del Congresu Internacional de Gastronomía, Muyeres y Mediu Rural FéminAS.​​​​​​