• La muestra, que va poder visitase a partir de mañana y hasta’l 13 de mayu, inspírase nes fotos documentales americanes

La Sala Borrón d'Uviéu va acoyer a partir de mañana la esposición Xente, de Pablo Casanueva. La muestra, escoyida pol programa d’artistes mozos del Principáu, ye un percorríu documental pola cultura asturiana y les sos xentes n'actividaes de la vida diaria.

La esposición, que va poder visitase hasta'l 13 de mayu, naz a partir d'un viaxe en motocicleta del autor pol conceyu de Ribeseya, col fin d'esquizar pelos sos pueblos y les sos xentes, énte la necesidá de dar visibilidá a la cultura asturiana y recoyer hestories de persones mayores p'asegurar la so pervivencia. Con esti proyectu de fotografía y vídeu, Pablo Casanueva realiza un percorríu en busca de tradiciones centenaries que conformen un pequeñu colax de la hestoria rexonal, de la que inmortaliza los testimonios de quien va atopando nel so camín.

Xente ta inspirada na fotografía documental americana y na española de los años 50. Con un enfoque fronteal, presenta a los sos protagonistes n'actividaes cotidianes, ensin composiciones forzaes, y con una complicidá evidente ente'l fotógrafu y los sos modelos, lo que facilita la conversación y l'acercamientu físicu.

Pablo Casanueva estudió Comunicación Audiovisual na Universidá de Burgos y na Universidá del País Vascu. La so relación cola imaxe empieza al traviés de la pintura, sigue cola fotografía y remata col cine. El so discursu básase na memoria familiar y colectiva y nel retratu identitariu de la realidá asturiana. L'artista participó en delles esposiciones fotográfiques y dibuxa ilustraciones pa la revista Formientu. Tamién ye autor d'una intensa obra de cine documental na que destaquen Bernabé (2012) y Llaberintu (2019). Amás, realizó dellos videoclips, dalgunos d'ellos pal grupu Los Berrones.

El director xeneral de Mocedá, Diversidá Sexual, y Derechos LGTBI, Marcos Torre, va asistir mañana, a les 19:30 hores, a la inauguración de Xente acompañáu pola comisaria de la esposición, Luisa Flaire, y por Pablo Casanueva.